Fota: BIEŁTA
«Mnie ciažka pavieryć, što ŭkraincy śviadoma zapuścili techniku ŭhłyb našaj terytoryi na 40 kiłamietraŭ, — kaža surazmoŭca «Našaj Nivy». — Pry hetym, kudy zapuścili? U rajon vučeńniaŭ, viedajučy što tam usio našpihavana technikaj.
I što zapuścili? Toje, što pakazana na fota, i bieśpiłotnikam nazvać nielha, adna nazva. Heta samatužny vyrab. Naŭmysna zapuskać jaho ŭ dobra abaronienuju zonu i spadziavacca, što jon vierniecca — hetaha nie moža być.
«Što tyčycca madeli, to jaje pa fota nie vyznačyš: sieryjnyja i rasijskija, i ŭkrainskija vyhladajuć inakš, — praciahvaje vajenny. — Usie tyja ekśpierty, jakija ŭ hetaj mašynie apaznavali to rasijskaha «Arłana», to ŭkrainskaha Spectator'a, nie majuć racyi. Heta ni pieršaje, ni druhoje.
Miarkujučy pa fota, naŭrad ci korpus hetaj samarobki z aluminiju ci dziuralu — vyhladaje, što jon płastykavy. A płastykavyja detali adlivajucca samastojna ŭ formach — prosty praces.
U hetaj madeli niama aeradynamiki: nałupili pramavuholnych detalaŭ, unutr sunuli prościeńkaje žaleza, kab fotkaŭ i trymaŭ maršrut — nu i ŭsio. Da vysakakłasnaha drona-špijona nie padobny.
Zvyčajna takija rečy mohuć vykarystoŭvacca dla manitorynhu svajoj terytoryi z metaj pošuku kantrabandystaŭ, samahonnych zavodaŭ, aktualizacyi łandšaftu».
Naš surazmoŭca vysoŭvaje prahmatyčnuju viersiju taho, što mahło b adbycca.
«Maja dumka zasnavanaja na praktycy, na tym, što ja nie adnojčy naziraŭ na svaje vočy: prablema takich samatužnych bieśpiłotnikaŭ u tym, što jany niajakasnyja i časta źbivajucca z maršrutu.
Nie viedaju, što tam va Ukrainie, ale biełaruskija vajskoŭcy sami takoha typu drony klapali i časta potym hublali i šukali ź miascovym nasielnictvam — dobra, kali na svajoj terytoryi, a nie na čužoj, — kaža vajenny.
— Kolki takich vypadkaŭ było, dakładna nie skažu, ale historyj ź ich pošukami ŭ armii hulała šmat.
Anałahičnym čynam prybałty zhubili svoj bieśpiłotnik na našaj terytoryi, u rajonie Hožskaha palihona, na hranicy ź Litvoj. Tady, zdajecca, nie padymali šumu, vybačylisia.
Biełaruskaja armija taksama adnojčy ŭmudryłasia zhubić nie tolki kustarščynu, ale i darahi impartny bieśpiłotnik — palacieŭ, i źnik sihnał. Pačali šukać. Voś tolki nie pamiataju, ci znajšli, ale tady taksama hučała viersija, što nie možam znajści, bo zalacieŭ da litoŭcaŭ.
Tut ža takaja samatužnaja technika, što moža narabicca što chočaš: źnikła suviaź z centram kiravańnia, i jon palacieŭ prosta napierad. Abo zakrałasia pamyłka ŭ raźliki na adnym miescy maršrutu, i jon palacieŭ boh viedama kudy na nastupnym etapie maršrutu».
«Ja dumaju, kali heta i ŭkrainski bieśpiłotnik, to adbyłosia toje, što adbyvałasia dziasiatki razoŭ da taho — samatužnaja mašyna źbiłasia z kursu padčas ablotu svajoj terytoryi, — miarkuje biełaruski aficer. — Kali rasijski, to tłumačeńnie padobnaje — rabiŭ ablot vučebnaj zony, upaŭ. Jon moža być i biełaruskim. Adnaznačna skazać pa źniešnim vyhladzie, čyj bieśpiłotnik źbili kala Bresta, niemahčyma. I heta dla mianie pakul niajasna».
Taksama naš surazmoŭca nie vyklučaje i varyjanta, što bieśpiłotnik moh być zapuščany niejkim trecim bokam — z terytoryi Ukrainy ci Biełarusi.
«Mahčymy klučyk — analiz taho, što ŭnutry, — kaža vajskoviec. — A ja tak razumieju, što tam usio davoli prosta: kamiera i fłeška, jakuju potym zabiraje haspadar. Naŭrad ci dron takoha typu pieradavaŭ infarmacyju anłajn.
Nie fakt, što pa hetym vyznačyš prynaležnaść, ale ŭ teoryi možna — hledziačy dzie pačaŭ zdymać. Adnak ja nie ŭpeŭnieny ŭ tym, što nam kažuć z televizara».
Čytajcie: Pralacieŭ kala 40 km. Pa BT pakazali siužet pra nibyta ŭkrainski špijon-bieśpiłotnik
Jak Ukraina robić staŭku na bieśpiłotniki ŭ abaronie ad Rasii
The Insider: Źbity na biełaruska-ŭkrainskaj miažy bieśpiłotnik — nie ŭkrainski, a rasijski
