Jašyn źviartaje ŭvahu ŭ abhruntavańni pietycyi, što Ramzan Kadyraŭ za 15 hadoŭ na čale Čačni pieratvaryŭ rehijon «u adasoblenuju dziaržavu ŭnutry Rasii». Pry hetym, jak nahadvaje palityk, Kadyraŭ sam pryznaje, što nie zmoh vyrašyć ekanamičnych prablem Čačni, a bieź fiederalnych datacyj respublika «nie pratrymajecca i troch miesiacaŭ».
Pa słovach Jašyna, u respublicy dziejničajuć svaje paradki, a rasijskija zakony, pa sutnaści, u Čačni nie pracujuć. Tam taksama sfarmiravanaja armija, jakaja łajalnaja asabista Kadyravu.
«Jon davaŭ publičnyja rasparadžeńni stralać u siłavikoŭ ź inšych rehijonaŭ Rasiei, jakija dziejničajuć na jaho terytoryi biez dazvołu čačenskich uładaŭ», — adznačyŭ Jašyn. Taksama jon nahadaŭ, što Kadyraŭ, jaho asiarodździe i miascovyja čynoŭniki publična pahražajuć žurnalistam, pravaabaroncam, sudździam i členam ich siemjaŭ.
Na momant hetaj publikacyi pietycyju padpisali bolš za 58 000 čałaviek. Ale kolki b jana ni nabrała, šancy na toje, što Kreml da jaje prysłuchajecca, zusim nievialikija. Pres-sakratar Pucina Dźmitryj Piaskoŭ na pytańnie ab pietycyi adkazaŭ, što ŭ Kramli jaje nie ŭsprymajuć surjozna, bo na płatformie Change.org, na jakoj źbirajucca podpisy, pavodle jaho słoŭ, «abiaźličanaje hałasavańnie, jakoje moža nakručvacca botami».
Kiraŭnik Čačni zaŭsiody pavodziŭ siabie vielmi nachabna, a apošnim časam zusim pierastaŭ siabie strymlivać. Jon pastajanna vystupaje z pahrozami na adras rasijskich palitykaŭ, žurnalistaŭ i pravaabaroncaŭ, siarod nialubych jamu ludziej byli taksama ŭkrainskija palityki i francuzskija karykaturysty.
Apošni vypadak źviazany z vykradańniem ź Nižniaha Noŭharada žonki sudździ Sajdzi Janhułbajeva Zaremy Mazajevaj, jakoje źviazvajuć ź dziejnaściu ich synoŭ. Kadyraŭ nie raz pahražaŭ siamji Janhułbajevych, a 2 lutaha jon zajaviŭ, što «z hetaha času siamiejcy daviadziecca žyć azirajučysia, uzdryhvać ad luboha stuku ŭ dźviery». Śledam za im z takimi ž pahrozami siamji Janhułbajevych vystupili čačenskija siłaviki i čynoŭniki, prytym abiacali navat adrazać hałovy i čynić inšyja ciažkija złačynstvy, supiarečnyja lubomu zakanadaŭstvu.
Čytajcie taksama:
Biełaruś padpisała płan supracoŭnictva z Čačnioj
Dzikaja historyja ŭ Rasii: kadyraŭcy vyvieźli žonku sudździ
«U Čačni sočać za paśpiachovaj i mudraj palitykaj»: Kadyraŭ zaklikaŭ biełaruski narod padtrymać Łukašenku
