Fota: Route55 / depositphotos.com
Ułady Łatvii rychtujuć umovy da mahčymaha pryniaćcia ŭciekačoŭ z Ukrainy. Pra heta zajaviła ministarka ŭnutranych spraŭ Łatvii Maryja Hołubieva, piša rus.lsm.lv. Jana padkreśliła, što ciapier nie varta zacyklivacca na kolkaści ludziej, jakuju Łatvija moža pryniać. Adnak palityk ličyć, što pavinna być zrazumieła, dzie i jak raźmiaścić da 10 tysiač čałaviek.
«U Łatvii jość płan na vypadak, kali ŭ našu krainu pojdzie vialiki napłyŭ uciekačoŭ. Hety płan isnuje niekatory čas, ale ciapier važna razumieć, što va Ukrainie jość kankretnyja abstaviny. Pa-pieršaje, u jaje jość biaźvizavy režym ź Jeŭrapiejskim sajuzam. Pa-druhoje, naš narod spraviadliva padtrymlivaje imknieńnie Ukrainy da ŭmacavańnia niezaležnaści i terytaryjalnaj cełasnaści svajoj krainy. Heta aznačaje, što budzie razumieć nieabchodnaść pryniać častku ŭkrainskich uciekačoŭ, kali, kryj Boža, pačniecca vajna».
Taksama rychtujucca da mahčymaha napłyvu biežancaŭ z Ukrainy i ŭłady polskich rehijonaŭ. Pra heta napisaŭ u Tvitary ministr unutranych spraŭ i administracyi Polščy Maryjuš Kamiński:
«Vidavočna, što ŭ suviazi ź situacyjaj va Ukrainie my rychtujemsia da roznych scenaryjaŭ. Adzin ź ich — dziejańni vajavodaŭ, źviazanyja z mahčymym napłyvam biežancaŭ z Ukrainy, jakija z-za mahčymaha kanfliktu mohuć šukać prytułku ŭ našaj krainie».
Taksama ŭčora pra patencyjnuju hatoŭnaść prymać uciekačoŭ zajaviła litoŭskaja premjerka Inhryda Šymanicie, jakaja była ź vizitam va Ukrainie:
«My nie razhladajem uvarvańnie Rasijskaj Fiederacyi va Ukrainu jak centralny scenaryj, tamu što my ŭsio jašče spadziajemsia, što ŭ hetaj situacyi voźmuć vierch dypłamatyčnaje raźviazańnie i zdarovy sens. Ale ŭrad budzie vitać ludziej, jakija ratujucca ad vajny».
