Miascovaje ŽREU vystaviła ekałahičnym aktyvistam rachunak u 3,3 miljona za likvidacyju hrafici.
13 žniŭnia ŭ Baranavickim sudzie razhladaŭsia sudovy pazoŭ miascovaha ŽREU da troch maładych ludziej, jakich zatrymali ŭ krasaviku za naniasieńnie niekalkich hrafici na ścienach Baranavickaha rajvykankamu i šviejnaj fabryki «Baraŭčanka». Tady aktyvistaŭ pryznali vinavatymi ŭ naniasieńni troch nadpisaŭ ekałahičnaha źmiestu i pakarali administracyjnymi štrafami: 18-hadovy Alaksiej Žynhieroŭski atrymaŭ 10 bazavych vieličyń (350 tys. rubloŭ), dvoje jahonych niepaŭnaletnich siabroŭ atrymali pa 2 b. v. (70 tys. rubloŭ). Praz try miesiacy svaje pretenzii aktyvistam vystaviła baranavickaje KUREP «ŽREU», jakoje praz sud vyrašyła kampiensavać straty za likvidacyju nadpisaŭ. Ale nie tolki tych, za jakija chłopcaŭ užo pakarali, ale i za nadpisy na vulicach Bresckaj i Lenina. Apietyt miascovych kamunalnikaŭ uražvaje — svaje vydatki jany acanili ŭ 3 młn 353 tys. rub. Aktyvisty častkova pahadzilisia z pretenzijami i vykazali hatoŭnaść vypłacić vydatki, ale tolki za tyja nadpisy, jakija nanieśli sami. Pry hetym jany źviarnulisia ŭ sud z prośbaj zapatrabavać ad pradstaŭnikoŭ ŽREU vyznačyć kaštarys vydatkavanych na zamaloŭvańnie kožnaha z hrafici srodkaŭ. Prośba była padtrymanaja sudździoj.
Siońnia adbyłasia sudovaje pasiedžańnie. Pradstaŭnik ŽREU na sud nie źjaviŭsia, kaštarys vydatkaŭ u sud nie byŭ pradstaŭleny. U vyniku sudździa nie zadavoliŭ pazoŭ baranavickich kamunalnikaŭ, bolš za toje, sudovyja vydatki pavodle sudovaha rašeńnia musić spłacić ŽREU. Rašeńnie baranavickaha suda moža być abskardžanaje ŭ vyšejšaj sudovaj instancyi.
