Jaŭhien Małachoŭski, fota z sacsietak. Jaŭhien zasnavalnik supołki UKantakcie «Heta Minsk, dzietka» (152 tysiačy padpisčykaŭ)
«Atrady samaabarony skazali: chłopiec, dalej nie pajedzieš, my ciabie nie puskajem. I ŭsio, biez tłumačeńniaŭ. Pytalisia: čaho tut šastaješ, navošta ty va Ukrainie? Kazali: u ciabie ściah akupantaŭ.
Ja jechaŭ praz Žytomirskuju i Rovienskuju vobłaści, i takoje staŭleńnie było na niekalkich błokpastach, nie na adnym.
Ludzi vielmi złyja. Kažuć prosta: tvaja kraina akupuje našu krainu», — kaža Małachoŭski.
Jon źviazvaje takoje staŭleńnie da siabie z tym, što ukraincy bačać biełaruskija numary na jaho mašynie:
«Ja prapanavaŭ ich źniać, ale skazali, što budu mieć jašče bolšyja prablemy, maŭlaŭ, mohuć pryniać za dyviersanta».
Pa słovach błohiera, jon paśpieŭ pabyvać i ŭ palicyi:
«U horadzie Navahrad-Vałynski (Žytomirskaja vobłaść) mianie zatrymali, pavieźli ŭ adździeł. Adkatali palcy, praviarali, chto ja, dapytvali. Maje adkazy zdymali na videa. Pierapisali telefon, prahladzieli pierapiski.
Padazravali, što ja mahu źbirać infarmacyju ab pieramiaščeńni vajskovaj techniki.
Pravieryli, ci niama ŭ telefonie rasijskich kantaktaŭ.
Pahuhlili, chto ja, kali daviedalisia, što błohier, to pahladzieli, što pisaŭ pra Łukašenku i Pucina.
Paśla ŭsich pravierak adpuścili. I moj znajomy taksama pryjechaŭ, patłumačyŭ palicyi, što mianie viedaje».
Ciapier Małachoŭski ŭ adnym ź siołaŭ Rovienskaj vobłaści:
«Vyjechać nie mahu: daroha tolki adna. Abjechać prablema. Taksama mnie abaviazkova treba ŭ Roŭna i Lvoŭ, zabrać žančyn.
A tut prablema ź bienzinam. U majoj mašynie jaho zastałosia mała. Prašu ŭ miascovych bienzin, ale ŭsie admaŭlajuć.
Paraili zvanić u MUS, u SBU, ja zvaniŭ, ale heta ničym nie dapamahło.
Zaprasiŭ dakumienty, što ja vałancior. Čakaju ich. Taksama dumaju, moža nalapić bieła-čyrvona-biełuju nalepku na numary, kab pakazać, što jość roźnica pamiž łukašyzmam i biełarusami. Taksama šukaju ukrainski ściah, kab prymacavać jaho ŭ mašynie, ale znajści lišni ściah tut taksama niaprosta».
Małachoŭski kaža, da jaho dachodzić šmat historyj pra takija ž prablemy ŭ biełarusaŭ, jakija jeduć na mašynach ź biełaruskimi numarami.
«Maje znajomyja zachraśli ŭ Łucku z maleńkimi dziećmi. Jechali na biełaruskich numarach i taksama ŭžo paśpieli pabyvać u SBU i palicyi, — kaža Jaŭhien. — Viedaju, što šmat biełarusaŭ vyjazdžaje z Ukrainy, tamu chaču papiaredzić ab prablemach, ź jakimi jany mohuć sutyknucca».