Pra heta 10 sakavika paviedamiŭ staršynia Koraścieńskaj hramady Uładzimir Maskalenka.
Trahiedyja adbyłasia na terytoryi byłoha małakazavoda. U dvanaccać hadzin nočy pačaŭsia mocny abstreł.
Pa słovach Maskalenki, horad bambili rasijskija samaloty, jakija vylecieli ź biełaruskich aeradromaŭ.
«Vyniki abstrełu z samalotaŭ vy možacie ŭbačyć: faktyčna razburanyja ŭsie pamiaškańni. Na žal, jość zahinuły, dva čałavieki akazalisia ŭ balnicy ź vielmi značnymi apiokami, jakija nie sumiaščalnyja z žyćciom, tamu faktyčna troje zahinułych ludziej. Dva ź ich — biełarusy, jakija mašynami stajali tut, paprasilisia na pieryjad, pakul buduć vyjazdžać. I jany nie viedali, što jakraz ź biełaruskich aeradromaŭ vyleciać rasijskija samaloty i buduć bambić horad Koraścień», — rasskazaŭ Uładzimir Maskalenka.
Pa infarmacyi «NN», dvoje paciarpiełych u Koraścieni biełarusaŭ rankam jašče byli žyvyja, u miascovaj lakarni. Zajavu ab śmierci kiraŭnik horada zrabiŭ z ulikam ich stanu i taho, što ich, imavierna, nie ŭdasca ŭratavać.
Inšyja biełaruskija dalnabojniki, jakija ciapier znachodziacca ŭ horadzie, nieachvotna razmaŭlajuć na temu zdareńnia: «Voś navošta vy pytajeciesia?»