Akazvajecca, što najbolš paciarpieli kitajskija biznesoŭcy. A taksama francuzskija miljardery. Straty samych bahatych ludziej aceńvaje vydańnie Business Insider.
Biernar Arno (uładalnik kancerna LVMH), Čžun Šanšań (zasnavalnik i prezident kampanii pa vytvorčaści napojaŭ Nongfu Spring) i Ma Chuaten (zasnavalnik Tencent). Fota: Wikimedia Commons
Pavodle padlikaŭ Business Insider, zasnavanych na danych Bloomberg, z 18 lutaha acenka aktyvaŭ 75 kitajskich miljarderaŭ źniziłasia bolš čym na 134 miljardy dalaraŭ.
Sama vajna i zakłapočanaść mahčymymi sankcyjami suprać kitajskich kampanij u vypadku padtrymki Rasii — nie adzinaja pryčyna źnižeńnia koštaŭ akcyj na biržach u Šanchai, Šeńčženie abo Hankonhu. U ciapierašni čas Kitaj zmahajecca z čarhovaj chvalaj karanavirusa.
Indeks najbujniejšych 50 kitajskich kampanij China A50 straciŭ za apošni miesiac bolš za 10%.
Akcyi budaŭničaj kampanii China Communications Construction Co Ltd i vytvorcy bytavoj techniki Midea Group patańnieli na 20%.
Kitajski miljarder, što straciŭ najbolšuju sumu — Čžun Šańšań, zasnavalnik i prezident kampanii pa vytvorčaści napojaŭ Nongfu Spring i mažarytarny ŭładalnik farmaceŭtyčnaj kampanii Beijing Wantai Biological. Bahaćcie Čžun Šanšania ŭ sakaviku skaraciłasia na 14 miljardaŭ dalaraŭ.
Zasnavalnik inviestycyjnaha chołdynhu Tencent Ma Chuaten straciŭ bolej za 10 miljardaŭ dalaraŭ.
Adnak miljarder, jaki pieražyŭ najbolšaje źnižeńnie svaich aktyvaŭ, — francuz Biernar Arno. Asnoŭny ŭładalnik i prezident LVMH (im naležyć brend Louis Vuitton) straciŭ 16 miljardaŭ dalaraŭ, abo 10 pracentaŭ taho, što mieŭ. Kampanija Arno mieła ŭ Rasii 120 kram, adnak 4 sakavika było pryniata rašeńnie ab spynieńni dziejnaści.
Druhim zaznaŭšym vializnyja straty miljarderam z Francyi zjaŭlajecca Fransua Pino — asnoŭny akcyjanier inšaha hihanta industryi raskošy Kering (im naležać brendy Gucci i Yves Saint-Laurent). Pavodle źviestak Bloomberg, z momantu pačatku vajny jaho bahaćcie skaraciłasia na 6,3 miljarda dalaraŭ, abo na 13 pracentaŭ.
Da vajny Francyja była druhim pa vieličyni inviestaram u rasijskuju ekanomiku. U Rasii pracavała 500 kampanij z francuzskim kapitałam, 35 ź jakich sa śpisu CAC40 (najmahutniejšyja kampanii, kaštoŭnyja papiery jakich pradajucca na Paryžskaj biržy). Francuzy zjaŭlalisia najbujniejšymi zamiežnymi pracadaŭcami ŭ Rasii, na ich pracavała 160 tysiač supracoŭnikaŭ.
U śpis kampanij, jakija da hetaha času nie syjšli z rynku Rasii, uvajšli francuzskija Auchan, Leroy Merlin, Decathlon i Accor.
Leroy Merlin maje ŭ RF 100 kram.
Najbolšyja padzieńni na fondavym rynku za apošni miesiac — ažno 37 pracentaŭ — zaznaje Renault. Dla hetaha kancernu Rasija była druhim pa vieličyni rynkam u śviecie. Taksama jany kantralujuć najbujniejšaha vytvorcu aŭtamabilaŭ u Rasii — AŭtaVAZ.