U Pientahonie adznačyli, što na praciahu minułych sutak nievialiki pracent rasijskich vojskaŭ pad Kijevam pakinuŭ svaje pazicyi.
Nahadajem, paśla pieramovaŭ u Stambule, rasijski bok zajaviŭ, što skaračaje vajennuju aktyŭnaść na Kijeŭskim i Čarnihaŭskim napramku.
«Niekatoryja z hetych vojskaŭ, pa našych acenak, pieradysłakujucca ŭ Biełaruś. U nas niama dakładnaj kolkaści, ale nichto ź ich nie viarnuŭsia ŭ miesca pastajannaj dysłakacyi. Kali rasijanie surjozna staviacca da deeskałacyi, jak jany heta nazyvajuć, to jany pavinny adpravić ich dadomu», — skazaŭ Kirbi.
Na dumku Pientahona, bataljonna-taktyčnyja hrupy, jakija adyšli z Kijeva, papoŭniać rasijskija siły na inšych napramkach. Pry hetym pres-sakratar viedamstva padkreśliŭ, što hrupoŭka pad Kijevam zastajecca vialikaj.
Akramia taho, nienazvany pradstaŭnik Minabarony ZŠA paviedamiŭ francuzskamu ahienctvu AFP, što rasijskija vojski pačynajuć sychodzić z terytoryi Čarnobylskaj AES.
U toj ža čas ukrainski Hienštab siońnia zajaviŭ, što rasijskija vojski pačali vykarystoŭvać aeraport Bresta dla abstrełaŭ Ukrainy. Raniej ukrainski bok, krainy Zachadu i hramadzianie Biełarusi fiksavali vykarystańnie rasijskimi vojskami abjektaŭ vajskovaj i avijacyjnaj infrastruktury dy špitaloŭ u Łunincy, Baranavičach, Homieli, Babrujsku, pad Minskam, u Kalinkavickim, Mazyrskim, Rečyckim, Chojnickim, Brahinskim i Naraŭlanskim rajonach.
