Suzasnavalnik rasśledavalnickaj hrupy Conflict Intelligence Team Rusłan Levijev
— Vy čuli słovy pradstaŭnika Minabarony Rasii pra toje, što na kijeŭskim kirunku jany «dasiahnuli svajoj mety» i ciapier jeduć na Danbas. Ci bačycie vy, što rasijskija vojski sapraŭdy adstupajuć? Jakija ŭ vas jość danyja?
— Kali kazać pra kijeŭski kirunak, my bačyli videazapisy ź Biełarusi, dzie jedzie kałona techniki desantnikaŭ sa ściahami Rasii, sa ściahami PDV u bok Homiela, Rečycy, — mabyć, dla pahruzki na čyhunačnyja ciahniki i nastupnaj pieradysłakacyi ŭ inšyja miescy.
Ale treba adznačyć, što za niekalki dzion da hetaha my bačyli, naadvarot, prybyćcio novaj hrupy desantnikaŭ u Biełaruś. I dalejšy ich los nieviadomy, kudy jany dalej padzielisia. Moža być, jany zajšli na terytoryju Ukrainy, i tady heta była ratacyja, a nie advod vojskaŭ.
Plus my bačym złučeńni pieršaj tankavaj armii, jakuju zdymajuć z frontu na čarnihaŭskim kirunku i sumskim kirunku, vyvodziać na terytoryju Rasii i ŭ dalejšym pieradysłakujuć albo na Kursk, albo na Biełharad z dalejšym čarhovym zachodam na terytoryju Ukrainy i atakaj u bok Danbasa, Iziuma, Sievieradaniecka, Lisičanska. Ale znoŭ ža, my ŭsie hetyja videazapisy adznačajem, my ich bačym, ale heta nijak nie supiarečyć mahčymamu varyjantu taho, što ŭsio, što adbyvajecca, — tolki ratacyja.
Heta tamu, što adny siły mohuć vychodzić, a inšyja pry hetym paralelna zachodzić. I tady karcina situacyi nijakim čynam nie mianiajecca. I pra heta ž havorać roznyja miascovyja čynoŭniki, naprykład, mer Čarnihava. Pa stanie na viečar jany ŭsie kazali, što nijakaha advodu niama, jość tolki ratacyja vojskaŭ, abstreły praciahvajucca, situacyja nijak nie źmianiłasia.
— Vy vierycie ŭ tuju taktyku, jakuju ciapier maluje Minabarony Rasii, što na kijeŭskim i čarnihaŭskim napramkach jany «vykanali svaju zadaču»? Ci sapraŭdy zadačaj rasijskich vajskoŭcaŭ było toje, kab sabrać usie ŭkrainskija siły dla abarony Kijeva i tym samym asłabić daniecki i łuhanski kirunki?
— Vyhladajuć hetyja śćviardžeńni, viadoma, sumnieŭna. Tamu što kali my ŭspomnim šerah asobnych faktaŭ, to jany całkam supiarečać tamu, što kaža Kanašenkaŭ (aficyjny śpikier Minabarony RF, — Red.).
Uspomnicie tuju kałonu Rashvardyi, jakaja pajechała na šturm Kijeva: heta zusim absurdnaja reč, ale tym nie mienš fakt, heta było. I pry hetym rashvardziejcy taksama raskazvali, što ich adpravili na šturm Kijeva.
Uspomnicie šturm Hastomiela. Kali vy nie płanavali ŭziać Kijeŭ, navošta naohuł u Hastomieli ŭsia hetaja apieracyja była? Možna było prosta padyści da Kijeva z boku Biełarusi, i takim čynam jamu pahražać, nie było patreby tady sprabavać uziać Hastomiel.
Uspomnicie raźviedvalna-dyviersijnyja hrupoŭki, jakija praryvalisia ŭ Kijeŭ. Byli pierastrełki ŭ samim horadzie, što taksama całkam supiarečyć usim hetym słovam Kanašenkava.
Cieła rasijskaha sałdata, što zahinuŭ pry ahresii va Ukrainu. Fota: AP
I ŭ Čarnihavie absalutna taja samaja situacyja. My bačyli ŭvieś čas ataki, sproby akružyć horad, padryvy mastoŭ cieraź Dziasnu — my ŭsio heta bačyli, i heta całkam supiarečyć słovam Kanašenkava, što nibyta hetyja ataki nie byli metaj tak zvanaj apieracyi.
— Adnačasova z abjavaj ab adychodzie rasijskaj armii z kijeŭskaha i čarnihaŭskaha napramkaŭ Čarnihaŭ, dy i inšyja harady vobłaści, u sieradu byli abstralanyja. Heta možna niejak rastłumačyć? Niaŭžo da nižejšaha składu, źviana nie danieśli infarmacyju, što z čarnihaŭskaha i kijeŭskaha napramkaŭ treba adychodzić?
— Ja sumniavajusia, što prablema ŭ hetym. Tak, viadoma, jość prablema suviazi ŭ rasijskim vojsku, niama narmalnaj kaardynacyi pamiž roznymi rodami vojskaŭ, pamiž roznymi kirunkami, taki fakt prysutničaje. Ale ja sumniavajusia, što hetyja abstreły adbylisia z-za drennaj kaardynacyi.
Chutčej za ŭsio, my bačym takuju chitraść z boku Minabarony Rasii i ŭ cełym rasijskich sił.
Jany zajavami ab advodzie vojskaŭ i stvareńniem karcinki ab nibyta advodzie vojskaŭ sprabujuć, pa-pieršaje, pramacać hlebu dla mahčymaści častkovaha źniaćcia sankcyj.
A pa-druhoje, heta dla taho, kab jašče bolš nacisnuć na jeŭrapiejskaje hramadstva, jeŭrapiejskija krainy i ŭ cełym Zachad, kab jany ciapier admovilisia pastaŭlać Ukrainie novyja typy ŭzbrajeńniaŭ.
Tamu što dla ich heta budzie vyhladać tak, što byccam by Rasija advodzić vojski, davajcie my tady ŭsio ž nie budziem pastaŭlać SPA, nie budziem pastaŭlać źniščalniki, a to my ich zaraz pastavim — i znoŭ usio vierniecca ŭ poŭny chaos.
Ale nakolki ja baču, heta zvyčajnaja chitraść, heta typovaja taktyka, jakuju vykarystoŭvaje Rasija. I toje, što my bačym abstreły hetych haradoŭ, Čarnihava i astatnich, heta nie drennaja niejkaja kaardynacyja, heta pieršapačatkova na heta nacelena i było.
— A kali ciapier pahladzieć na Łuhanskuju i Danieckuju vobłaści, jak daloka rasijskaj armii ŭdałosia tam prasunucca, kali, viadoma, nie brać tak zvanyja «DNR» i «ŁNR»? Možacie nazvać kantralavanyja imi častki abłaściej, kali možna, u pracentnych suadnosinach?
— My nie pryvykli ličyć usio ŭ pracentach, my bolš hladzim pa rajonach. Zrazumieła, było bačna, što jany na poŭnačy Łuhanskaj vobłaści daadrezali tuju častku terytoryi, jakaja miažuje ŭłasna z Rasijaj. Ale tam było mała nasielenych punktaŭ, jany byli nievialikija. Tamu ŭkrainskija siły adtul apieratyŭna vyjšli, kab nie patrapić u kacioł. I, na naš pohlad, heta była razumnaja taktyka ŭ pryncypie.
Pa častcy Danieckaj vobłaści my bačym ich prasoŭvańnie ŭ bok Iziuma. I dalej, kali my havorym pra nakirunak u bok Charkava adnosna Daniecka, to Izium — heta samaja dalokaja kropka, kudy jany zmahli prasunucca. I ciapier uvieś čas iduć zajavy Minabarony Rasii, što Izium całkam pad kantrolem Rasii. Ale takija ž zajavy hučali jašče niekalki dzion tamu, chacia pa fakcie, pa videazapisach bajoŭ my bačym, što heta nie tak, i jak minimum paŭdniova-ŭschodniaja častka Iziuma znachodzicca pad kantrolem ukrainskich sił.
Kali my kažam pra kirunak, jaki idzie z boku paŭdniovaj častki, z boku Maryupala, Mielitopala, to tam my bačym, što rasijskija siły prasunulisia maksimum da Hulajpola, Takmaka i znoŭ zabuksavali.
Apošnija prykładna dva tydni rasijskija siły na hetych dźviuch kropkach: Hulajpole z adnaho boku i Izium z druhoha boku, buksujuć i nijak nie mohuć rušyć napierad.
I mabyć, dla hetaha i sprabujuć častku sił pierafarmavać, pierakinuć na Danbas, kab chacia b pytańnie z Danbasam pasprabavać zakryć.