Mižnarodnaja supolnaść paabiacała, što hetyja złačynstvy nie zastanucca biespakaranymi.
Prezident Jeŭrasajuza Šarl Mišel anansavaŭ novyja sankcyi suprać RF, a taksama paabiacaŭ padtrymku z boku Jeŭrasajuza ŭ pieraśledzie za vajennyja złačynstvy, učynienyja armijaj Rasii na terytoryi Kijeŭskaj vobłaści.
«Ja šakavany fatahrafijami, jakija ŭrazajucca ŭ pamiać i śviedčać pra źvierstvy, učynienyja rasijskaj armijaj u vyzvalenych rajonach Kijeŭščyny», — napisaŭ jon, dadaŭšy chešteh «bučanskaja raźnia».
Ministerstva abarony RF adreahavała na hetyja śviedčańni vajennych złačynstvaŭ. Kadry z Bučy i achviary siarod mirnaha nasielnictva jany cynična nazvali fejkami.
«Cieły na videa byccam by śpiecyjalna raskłali dziela stvareńnia bolš dramatyčnaj karcinki. «Brackaja mahiła» ź ciełami zroblenaja VSU, bo bolš za miesiac tamu jany zabłakavali horad, padarvaŭšy most kala Irpienia», — apublikavała viedamstva ŭ svaim aficyjnym telehram-kanale post ź inšaha kanała.
Dva dni tamu na telekanale «Źviezda», padviedamasnym Minabarony RF, paviedamlałasia, što rasijskija marskija piechacincy pravodziać «začystku» nasielenych punktaŭ u Kijeŭskaj vobłaści.
«Kamandzir adnaho z padraździaleńniaŭ marskoj piachoty Alaksiej Šabulin adznačyŭ, što ciapier rasijskija marpiechi pravodziać pošukava-vyviedvalnyja dziejańni i ažyćciaŭlajuć začystku nasielenych punktaŭ z dalejšaj zadačaj zamacavacca ŭ ich», — cytavała «Mieduza» paviedamleńnie telekanała.
