Hości ź Jeŭropy ŭ Bučy
«Naviedali Buču. Ja pakazaŭ prezidentu Jeŭrakamisii Ursuli fon der Lajen, viarchoŭnamu pradstaŭniku ES pa zamiežnych spravach i palitycy biaśpieki Žazepu Barelu i premjer-ministru Słavakii Eduardu Hiehieru źvierstvy, učynienyja rasijskimi vajskoŭcami nad cyvilnymi ŭkraincami.
My nikoli nie prabačym vorahu hetych złačynstvaŭ. Supolna pracujem z našymi jeŭrapiejskimi partniorami, kab jak maha chutčej spynić ahresara», — zajaviŭ Šmyhal.
Padčas vizitu Ursula fon der Lajen zajaviła, što ŭkrainskuju zajaŭku na ŭvachod u Jeŭrasajuz chočuć pradstavić Radzie ES užo ŭletku, paviedamlaje «Reuters».
«Zvyčajna prachodziać hady, pierš čym Rada ES prymie zajaŭku na členstva, ale Ukraina zrabiła heta za tydzień ci dva, i ja zaklikaju ruchacca napierad jak maha chutčej… Naša meta — pradstavić zajaŭku Ukrainy Radzie hetym letam», — skazała prezidentka Jeŭrakamisii.
Ursuła fon der Lajen siońnia taksama aficyjna pieradała prezidentu Ukrainy Uładzimiru Zialenskamu apytalnik, zapaŭnieńnie jakoha źjaŭlajecca nieabchodnym krokam dla nadańnia Ukrainie statusa kandydata ŭ ES.
«My budziem hatovyja z adkazami praz tydzień», — skazaŭ Zialenski.
Žazep Barel, jaki taksama pryjechaŭ u Kijeŭ 8 krasavika, vykazaŭ spadzieŭ, što Jeŭrasajuz najbližejšymi dniami daść Ukrainie jašče 500 miljonaŭ jeŭra.
