Užo ź vieraśnia ŭ kožnaj škole na infarmacyjnych stendach źjaviacca «10 załatych praviłaŭ piedahoha». Što tam budzie, padrabiazna nie raskryvajecca. Ale «nastaŭniki pavinny paćviardžać vysoki status adpaviednym źniešnim vyhladam, pavodzinami ŭ sacsietkach, pravilna vybudavanaj kamunikacyjaj z baćkami. U adkaz pavinny atrymlivać pavažlivaje staŭleńnie».
Sa słoŭ ministra adukacyi, navučency buduć pakidać mabilniki ŭ śpiecyjalna abstalavanych miescach, ich možna budzie vykarystoŭvać tolki ŭ navučalnych metach, naprykład, pry sčytvańni QR-kodaŭ.
Kantrol za źniešnim vyhladam taksama budzie ŭzmocnieny. Viedamstva prapracoŭvaje ŭviadzieńnie z 1 vieraśnia nadychodziačaha navučalnaha hoda adzinych elemientaŭ školnaha adzieńnia dla kankretnaj ustanovy. A z 2023 hoda mahčymaje ŭviadzieńnie abaviazkovaj školnaj formy.
Va ŭsich škołach adkryjuć muziei abo muziejnyja pakoi.
Akramia taho, padrychtavany zahad, jakim praduhledžanaje praviadzieńnie na pastajannaj asnovie ŭračystych liniejek z abaviazkovym prasłuchoŭvańniem dziaržaŭnaha himna, uźniaćciem (vynasam) dziaržaŭnaha ściaha ŭ dni dziaržaŭnych śviataŭ i śviatočnyja dni Biełarusi.
«Heta budzie adbyvacca va ŭstanovach daškolnaj, ahulnaj siaredniaj, siaredniaj śpiecyjalnaj, prafiesijna-techničnaj, vyšejšaj adukacyi, a taksama ŭ letnich azdaraŭlenčych łahierach, studenckich atradach. U škołach i himnazijach buduć vykonvać himn i padymać ściah pierad pačatkam i ŭ kancy kožnaj čverci, padčas praviadzieńnia cyrymonii ŭručeńnia dakumientaŭ ab adukacyi. A ŭ letnich azdaraŭlenčych łahierach, łahierach studatradaŭ — pierad pačatkam i ŭ kancy źmieny».
Prablemu deficytu kadraŭ siarod piedahohaŭ ministr paabiacaŭ vyrašać pavyšeńniem zarpłaty.
Pavodle jaho, za studzień-krasavik hetaha hoda ŭ paraŭnańni z takim ža pieryjadam minułaha siaredniamiesiačnaja zarpłata, naprykład, u nastaŭnikaŭ pavialičyłasia na 20,2 pracenta.
