Fota: Bob Edme / AP
Asnoŭnaje supiernictva za kantrol nad parłamientam razhorniecca pamiž tryma vybarčymi błokami i partyjaj na čale z Maryn Le Pien.
Apytańni, praviedzienyja pierad vybarami, pakazvajuć, što ŭ błoka «Razam!», jaki padtrymlivaje prezidenta Emaniuela Makrona, jość šancy atrymać u parłamiencie bolšaść. Jon moža, pa dadzienych Ifop, atrymać 250-290 miescaŭ ź nieabchodnych 289.
Levy błok Žan-Luka Miełanšona, jaki abjadnoŭvaje sacyjalistaŭ, kamunistaŭ i zialonych, moža atrymać 190-235 mandataŭ.
Treciaj siłaj, chutčej za ŭsio, stanuć pravacentrysty z 42-62 kresłami, a nacyjanalisty Le Pien mohuć atrymać 25-28 miescaŭ.
Ale mahčymyja i niečakanaści. Najpierš ich čakajuć ad levaha błoka Miełanšona, jaki maje šancy svaim pośpiecham pazbavić błok Makrona parłamienckaj bolšaści, źviazaŭšy tym samym ruki prezidentu.
Pahłynuŭšy pamiarkoŭnych levych, 70-hadovy Miełanšon, jaki zachaplajecca kolišnim vieniesuelskim lidaram Uha Čaviesam i choča, kab Francyja vyjšła z NATA, stvaryŭ mahutny levy ruch, jaki dasiahnuŭ nievierahodnaha adzinstva. Jon padabajecca, u pryvatnaści, ludziam, jakija vystupajuć za ekałahičnyja źmieny, haradžanam i moładzi: jaho padtrymlivajuć 44% ludziej va ŭzroście ad 18 da 24 hadoŭ.
Hetym razam Miełanšon vystaŭlaje kandydatami ŭ deputaty śmiełych pačatkoŭcaŭ u palitycy, uklučajučy piekara z uschodu Francyi i pakajoŭku z-pad Paryža. Taksama jon sprytna raźviazaŭ u krainie debaty vakoł roli, u jakoj jon bačyć samoha siabie — premjer-ministra.
Partyja Makrona nie moža hulać na naviźnie, tamu abapirajecca pieradusim na svaje prahramnyja abiacańni. Najbolš važnym napramkam pracy parłamienta ŭ vypadku pieramohi praŭładnaha błoka dekłaravana pieraadoleńnie kryzisu, vyklikanaha rostam koštu žyćcia. Upor robicca na sumiesnuju pracu z prezidentam i realizacyju jaho pieradvybarčych abiacańniaŭ: Makron abiacaŭ pravieści ŭ najbližejšyja piać hadoŭ sieryju reformaŭ u śfiery padatkaŭ, sacyjalnaha zabieśpiačeńnia i ekałohii.
