Nastupstvy bajoŭ pad Sievieradanieckam. Fota: Associated Press
Ejfaryja, narodžanaja pieršymi ŭpeŭnienymi pieramohami ŭkraincaŭ nad razhublenymi rasijskimi vajskoŭcami, pačynajuć źnikać. Maskva praviała rabotu nad pamyłkami i pastupova prasoŭvajecca, bo maje vialikuju pieravahu ŭ ahniavoj mocy i najpierš u artyleryi.
Abiacanyja zachodnija sistemy ŭzbrajeńniaŭ prybyvajuć, ale zanadta pavolna i zamałych kolkaściach, kab spynić paŭzučy nastup Rasii ŭ Danbasie.
Ukraincy ŭsio jašče supraciŭlajucca, ale ŭ ich zakančvajucca bojeprypasy, i straty značna vyšejšyja, čym na pačatkovych etapach vajny. Ciapier kožny dzień hinie kala dźviuch socień ukrainskich sałdat, u paraŭnańni z sotniaj u kancy minułaha miesiaca, paviedamiŭ u piatnicu Bi-bi-si pamočnik prezidenta Uładzimira Zialenskaha. Heta aznačaje, što, z ulikam paranienych, ukrainskaja armija štodzień hublaje pad tysiaču bajcoŭ.
Rasiejcy pa-raniejšamu robiać pamyłki i taksama hublajuć ludziej i techniku, choć i mienšymi tempami, čym u pieršyja miesiacy kanfliktu. Prykmieta taho, što jany adčuvajuć niedachop abstalavańnia, — vyvad u boj zakansiervavanych tankaŭ T-62 savieckaj epochi.
Ale ahułam, kali ŭ kancy sakavika zdavałasia, što vajna niečakana stała poŭnym pravałam Rasii, ciapier usio schilajecca da taho, što Rasija dadušyć za košt svajoj bolšaj siły.
Rasiejskija vojski kala akupavanaha Ščaścia. Fota: Associated Press
Nadziei Ukrainy i ZŠA na toje, što novyja pastaŭki zachodniaj zbroi dazvolać Ukrainie viarnuć sabie inicyjatyvu i tyja prykładna 20 pracentaŭ ukrainskaj terytoryi, jakija Rasija kantraluje, pačynajuć vyhladać zaŭčasnymi, skazaŭ Alaksandr Daniluk, daradca ŭkrainskaha ŭrada ŭ pytańniach abarony i vyviedki.
«Stratehija i taktyka ruskich ciapier zusim inšyja. Jany stanoviacca značna bolš paśpiachovymi, — skazaŭ jon, — U ich bolš resursaŭ, čym u nas, i jany nie śpiašajucca. Ciapier značna mienš miesca dla aptymizmu».
Ruskija vykarystoŭvajuć suprać nas dalnabojnuju artyleryju, a nam časta niama čym adkazać. Jany mohuć atakavać z adlehłaści dziasiatki kiłamietraŭ, i my nie možam adkryć ahoń u adkaz. My viedajem usie kaardynaty ŭsich ich važnych celaŭ, ale ŭ nas niama srodkaŭ paražeńnia».
Sa słoŭ Daniluka, va Ukrainy ciapier amal całkam skončylisia bojeprypasy dla sistem uzbrajeńnia savieckaj epochi, jakija byli asnovaj jaje arsienału, a va ŭschodniejeŭrapiejskich krain, jakija padtrymlivali tyja ž sistemy, skončylisia liški, jakija tyja mahli pieradavać. Ukrainie terminova nieabchodna pierajści na bolš dalnabojnyja i składanyja zachodnija sistemy, ale ich pastupiła vielmi mała, nie paraŭnana ź vielizarnaj ahniavoj mocaj Rasii, skazaŭ jon.
Pachavańnie ŭkrainskaha vajskoŭca. Fota: Associated Press
Pavodle jaho słoŭ, Rasija vypuskaje pa ŭkrainskich pazicyjach da 50 tysiačaŭ artyleryjskich snaradaŭ za dzień, a ŭkraincy mohuć adkazvać tolki 5—6 tysiač snaradaŭ za dzień. Złučanyja Štaty abaviazalisia pastavić 220 000 snaradaŭ — ale heta ništo, heta na čatyry dni.
Pavodle acenak Pientahona, atrymańnie amierykanskich haŭbičnych artyleryjskich harmat M777, dazvolić Ukrainie zraŭniacca z rasijskaj ahniavoj mahutnaściu. Pakul ža ruskija praciahvajuć nastupać.
Čatyry bolš daskanałych i dalnabojnych reaktyŭnych sistemy załpavaha ahniu HIMARS, jakija ŭkraincy daŭno prasili ŭ Złučanych Štataŭ, znachodziacca na šlachu razam z tryma anałahičnymi sistemami, abiacanymi Vialikabrytanijaj. Ale spačatku ŭkraincaŭ treba budzie navučyć ich vykarystańniu, a da taho, jak jany patrapiać na pole boju, pa słovach amierykanskich čynoŭnikaŭ, jašče niekalki tydniaŭ. Pientahon namiaknuŭ, što budzie dastupna bolš sistem, jak tolki ŭkraincy prademanstrujuć, što navučylisia ich vykarystoŭvać.
Ale ruskija pačali vajnu, majučy kala 900 svaich ułasnych padobnych sistem, i choć ukraincy źniščyli niekalki socień ź ich, u ruskich usio jašče zastalisia sotni, kaža Daniluk.
Tym časam ruskija adaptavali svaju taktyku takim čynam, jaki dazvalaje napoŭnicu vykarystać svaju ahniavuju moc, zastajučysia na adlehłaści ad ukrainskich pazicyj, biaźlitasna abstrelvajučy ich, a paśla zachoplivajučy terytoryju, jak tolki ŭkraincy vymušana adstupajuć.
Ruskija taksama pačali lepš kaardynavać vykarystańnie artyleryi, avijacyi i piachoty, kaža Rob Li, były marski piachotnik ZŠA, jaki pracuje ŭ Instytucie daśledavańnia zamiežnaj palityki.
Rasijskija aficyjnyja asoby zajaŭlajuć, što rasijskija vojski prasoŭvajucca pavolna, čym paźbiahać achviar siarod hramadzianskaha nasielnictva. Nasamreč, na dumku analitykaŭ, novaja taktyka dazvalaje minimizavać straty rasijskaj armii, a harady i vioski kala linii frontu źniščajucca dazvańnia.
Razbombleny žyły dom u Bachmucie, na ŭschodzie Ukrainy. Fota: Associated press
Ukraincy pa-raniejšamu vajujuć mužna i mohuć dobra ŭvalić pa ruskich, kali ŭ ich budzie takaja mahčymaść, skazaŭ Dźmitryj Alpiarovič z kansałtynhavaj kampanii Silverado, pryvioŭšy prykład pravalnaj sproby ruskich navieści pierapravu cieraź Sievierski Daniec. Tady sotni rasijskich vajskoŭcaŭ zahinuli, a dziasiatki adzinak techniki byli źniščanyja. Pa jaho słovach, ukraincy taksama nanosiać paśpiachovyja ŭdary bieśpiłotnikami pa rasiejskim pazicyjach i kałonach zabieśpiačeńnia.
Rasija nie publikavała dadzienych ab achviarach z sakavika. «Ale kali vy pahladzicie, što adbyvajecca, to ja byŭ by šakavany, kali b ruskija nieśli straty, blizkija da tych, jakija ciapier niasuć ukraincy», — skazaŭ Alpiarovič.
Va Ukrainy chapaje žyvoj siły, ale niama čym ich uzbroić.
Ruskija ž sutykajucca ź niedachopam ludziej paśla ciažkich strat, jakija jany panieśli ŭ pieršyja dni vajny. Zachodnija aficyjnyja asoby aceńvajuć kolkaść zahinułych ruskich na dadzieny momant ad 15 000 da 20 000 čałaviek, pry hetym da traciny pieršapačatkovych sił ŭvarvańnia apynulisia nieprydatnymi dla bajavych dziejańniaŭ z-za ranieńniaŭ, pałonu i straty abstalavańnia paśla katastrof pieršych dvuch miesiacaŭ.
Ale Rasija adnaviła svaje siły lepš, čym taho čakali mnohija vajskovyja analityki, mabilizavaŭšy kala 40—50 tysiačaŭ čałaviek za apošnija dva miesiacy, pavialičyŭšy ŭzrost dla zaklučeńnia kantraktu, razharnuŭšy novyja siły i papoŭniŭšy paškamutanyja padraździaleńni.
Źniščany most cieraź Sievierski Daniec u rajonie Rajharadki Danieckaj vobłaści. Fota: Associated Press
Zachodnija aficyjnyja asoby kažuć, što jany čakajuć, što rasiejskija vojski nieŭzabavie atrymajuć poŭny kantrol nad horadam Sievieradanieck, a zatym, napeŭna, źviernuć svaju ŭvahu na horad Lisičansk na procilehłym bierazie raki, apošnija harady Łuhanskaj vobłaści pad ukrainskim kantrolem.
Paśla hetaha možna čakać bajoŭ za Danieckuju vobłaść.
Lisičansk budzie ciažkaj zadačaj dla ruskich, tamu što ŭkraincy tam kantralujuć ŭzvyšša, a artyleryja ruskich maje mienšuju pieravahu ŭ blizkim haradskim bai, skazaŭ Konrad Muzyka, dyrektar abaronnaj kansałtynhavaj kampanii Rochan Consulting.
Ź jahonych słoŭ, Rasii moža być ciažka padtrymlivać svaje niadaŭnija dasiahnieńni, uličvajučy straty, jakija jana paniesła dahetul. Mnohaje budzie zaležać ad taho, ci ŭkraincy zmohuć utrymać abaronu pa linii raki Daniec.
