Uvieś čas łukašenkaŭskaja prapahanda ŭschvalaje dziaržaŭnuju palityku ŭ pytańniach sielskaj haspadarki. Śćviardžajecca, jakaja biełaruskaja sielskaja haspadarka efiektyŭnaja, jak ułada kłapocicca pra jaje. Toje, što ŭ Biełarusi niama hoładu, padajecca jak vielizarnaje dasiahnieńnie.
Kali havorka zachodzić pra inšyja krainy, to prapahanda maluje apakaliptyčnuju karcinu: usio razvalili, raspradali, ziamla pazarastała pustaziellem, nie toje, što ŭ Biełarusi z mocnym haspadarnikam. Dajšło da taho, što ANT paviedamlaje: «U susiednich krainach — hoład i charčovy kryzis». Heta — absalutnaja chłuśnia.
Tak, uvieś śviet pieražyvaje składanyja časy. U zachodnich krainach — rekordnaja za apošnija hady inflacyja. Pavyšeńnie cen (u tym liku na charčovyja pradukty) maje hłabalny charaktar. Siarod hałoŭnych pryčyn takoj vysokaj inflacyi ŭ śviecie na pieršym miescy kavid, jaki vyklikaŭ kałasalnyja zboi ŭ łancužkach pastavak tavaraŭ i kampanientaŭ dla vytvorčaści.
Nastupnaja istotnaja pryčyna — enierhietyčny kryzis u Jeŭropie, źviazany z deficytam hazu i rekordnymi cenami na spotavym rynku. Varta nahadać i pra enierhietyčnuju hazavuju vajnu, jakuju raźviazała suprać Jeŭropy Rasija, što vykarystoŭvaje haz jak hieapalityčnuju zbroju.
Uskładniaje situacyju i rasijska-ŭkrainskaja vajna. Hetyja dźvie krainy źjaŭlajucca adnymi z hałoŭnych eksparcioraŭ zbožža, i pieraboi z pastaŭkami z hetych krain mohuć pryvieści da prablem u krainach, jakija ŭkrainskaje i rasijskaje ziernie impartujuć.
Ale ni Jeŭropie, ni susiednim krainam hoład nie pahražaje. U našym rehijonie z charčovaj biaśpiekaj usio dobra. Navat pavyšeńnie cen na pradukty nie pryviadzie da hoładu ŭ Jeŭropie, tamu što dola raschodaŭ na ježu zajmaje nievialikuju častku ŭ ahulnaj struktury raschodaŭ jeŭrapiejcaŭ, našmat mienšuju, čym u Biełarusi.
Sielskaja haspadarka ŭ susiednich krainach taksama adčuvaje siabie dobra. Našmat lepš, čym u Biełarusi ź jaje «mocnymi haspadarnikami». Voś tolki niekalki ličbaŭ.
Ahulny abjom zboru zbožžavych u susiedniaj Litvie ŭ 2021 hodzie skłaŭ 6,1 młn ton. Kraina, u niekalki razoŭ mienšaja Biełarusi pa płoščy, z anałahičnym biełaruskamu klimatam, stała adnym ź viadučych eksparcioraŭ pšanicy ŭ ES.
Fienamienalnych vynikaŭ u sielskaj haspadarcy dasiahnuła i Polšča. Kraina ŭ 2021 hodzie pastaviła novy rekord i ekspartavała pradukcyi sielskaj haspadarki na 37,4 młrd jeŭra.
Kraina za 18 hadoŭ členstva ŭ Jeŭrasajuzie pieratvaryłasia ŭ adnaho z hałoŭnych vytvorcaŭ cybuli, bulby, burakoŭ, kapusty, pamidor, baravikoŭ, kłubnic, małaka, jajek, jabłyk.
U 2021 hodzie va Ukrainie sabrany rekordny ŭradžaj zbožžavych i alejnych kultur: 106 młn ton. Bolš za 84 młn ton z ahulnaha sabranaha abjomu skłali zbožžavyja i zierniebabovyja kultury, jašče 22,6 młn ton — alejnyja.
Takim čynam Ukraina sabrała ŭradžaj bolš čym u 10 razoŭ vyšejšy, čym u Biełarusi, chacia Ukraina kantraluje terytoryju tolki ŭ 2,5 raza bolšuju za biełaruskuju.
I tam nie adbyvajecca «bitvy za ŭradžaj», tamu što ziamla naležyć sialanam, i kožny ź ich sam adkazvaje za vyniki svajoj pracy, nie majučy patreby va ŭkazańniach źvierchu.
Prezidenty Polščy, Litvy i Ukrainy nie vyjazdžajuć na pali, inśpiektujučy chod uborki i nie pravodziać sielektarnych narad. I nijakaha hoładu niama, navat va ŭmovach vajny.
