Niepaŭnaletniaha chłopca zatrymali 26 sakavika razam ź jaho starejšym bratam na adnym z rasijskich błok-pastoŭ u Vyšharadskim rajonie Kijeŭskaj vobłaści, kali jany na rovarach viartalisia dadomu ad svajoj siastry ź vioski Prybirsk u hetym ža rajonie.
Hetaja historyja apisanaja ŭ adnym z sudovych rašeńniaŭ, vyniesienych pa spravie suprać rasijskich vajskoŭcaŭ pa fakcie parušeńnia zakonaŭ i zvyčajaŭ vajny, jakaja rasśledujecca z 9 červienia.
Paśla zatrymańnia rasijanie pravieryli ich dakumienty, raździeli i ahladali cieły chłopcaŭ u pošukach tatu. Kali ničoha padazronaha nie znajšli, zahadali im čakać, a pamiž saboj pačali razmaŭlać pra toje, što braty nibyta źjaŭlajucca dyviersantami.
Praz hadzinu paśla hetaha chłopcaŭ pasadzili ŭ BTR z nadpisam «V» i pavieźli ich u kirunku Čarnobyla. Pa darozie im spačatku naciahnuli na hałovy miaški dla śmiećcia, a potym spynilisia, vyvieli z BTR, zaviazali klejkaj stužkaj ruki i pačali bić, abvinavačvajučy ich u dyviersijnaj dziejnaści.
Potym bratoŭ, adzin ź jakich byŭ niepaŭnaletni, pasadzili ŭ aŭtobus i ź miaškami na hałovach i zaviazanymi rukami pavieźli ŭ nieviadomym kirunku. Praź niejki čas aŭtobus spyniŭsia i ich zaviali ŭ niejkaje pamiaškańnie. Paśla pravierki, jakuju pravodzili, jak jany zrazumieli pa formie, biełaruskija pamiežniki, bratoŭ raździalili — małodšaha adpravili ŭ internat u Mazyr.
Paźniej ukrainskamu padletku paviedamili, što jaho pieramieściać u dziciačy dom — śpiecyjalny piedahahičny centr u Mazyry. Ale dyrektarka hetaj ustanovy źviazałasia z pradstaŭnikami Čyrvonaha Kryža, kab znajści baćkoŭ ci svajakoŭ chłopčyka. Ich znajšli, i 22 krasavika chłopiec pozna ŭviečary viarnuŭsia dadomu.
Pra los starejšaha brata ŭ sudovym rašeńni nie zhadvajecca. Nieviadoma, dzie jon znachodzicca, — na terytoryi Biełarusi ci Ukrainy, abo jaho vyvieźli ŭ Rasiju.
