Indyvidualnyja pradprymalniki prapanoŭvajuć prezidentu Biełarusi razhledzieć pytańnie ab prafiesijnaj prydatnaści i stupieni adpaviednaści zajmanaj pasadzie ministra handlu, ministra ekanomiki, a taksama ministra pa padatkach i zborach.
Pra heta havorycca ŭ rezalucyi, pryniataj 21 vieraśnia ŭ Minsku na Usiebiełaruskim samicie pradprymalnikaŭ «Za prava pradprymać!». U mierapryjemstvie, arhanizavanym RHA «Pierśpiektyva», uziali ŭdzieł prykładna 200 pradprymalnikaŭ z usich rehijonaŭ Biełarusi.
U rezalucyi taksama ŭtrymlivajecca patrabavańnie dazvolić subjektam małoha pradprymalnictva handlavać biełaruskim pivam u kijoskach i paviljonach, spynić praktyku kanfiskacyi tavaraŭ i nakładańnia vialikich štrafaŭ, abjavić maratoryj na pravierki pradprymalnikaŭ terminam na dva hady.
Aprača taho, pradprymalniki nastojvajuć na admienie zabarony na najom IP rabotnikaŭ, a taksama na adnaŭleńni kijoskaŭ u Minsku i inšych haradach «dla aptymizacyi roźničnaha handlu i padtrymki tavaraabarotu».
U dakumiencie padkreślivajecca, što pradprymalniki hatovyja dapamahčy dziaržpradpryjemstva ŭ razhruzcy składoŭ, stvareńni novych pracoŭnych miescaŭ. Jany taksama hatovyja akazvać padtrymku miascovym biudžetam i «dapamahać ludziam pieražyć ciažkija časy, prapanoŭvać dastupnyja, jakasnyja tavary». «My hatovyja ŭsio heta zrabić, ale biez prymusu i naviazvańnia nam cen, kvot, režymu najmu i formy apłaty», — havorycca ŭ rezalucyi.
Udzielniki kanfierencyi vystupajuć za «realnaje partniorstva biźniesu i ŭłady», ale suprać «imitacyi padtrymki pradprymalnictva». «My pakidajem za saboju prava abaraniać našy kanstytucyjnyja pravy, vykazvać svaju hramadzianskuju pazicyju ŭsimi zakonnymi srodkami až da zabastovak i demanstracyj u vypadku dalejšaha ihnaravańnia patrabavańniaŭ i prapanoŭ samitu», — padkreślivajecca ŭ pryniataj rezalucyi.
Jak paviedamiŭ BiełaPAN lider «Pierśpiektyvy» Anatol Šumčanka, tekst dakumienta budzie adpraŭleny ŭ Administracyju prezidenta, Saviet ministraŭ, abłasnyja vykankamy i Minharvykankam.