Fota: Devby.io
Jak daviedaŭsia Office Life, rezident PVT «Sikłum Bieł», jaki ŭvachodzić u mižnarodnuju hrupu Ciklum, z červienia hetaha hoda znachodzicca ŭ pracesie likvidacyi.
U 2015 hodzie kantrolny pakiet Ciklum nabyŭ stvorany Džordžam Sorasam Ukrainian Redevelopment Fund. Srodki bahataha inviestara dazvolili kampanii ŭzmacnić svaju prysutnaść na starych i vyjści na novyja rynki.
Z zaviaršeńniem likvidacyi hetaj «dački» Biełaruś znoŭ pakinie Džordž Soras, jaki kala 25 hadoŭ tamu ŭžo sychodziŭ z našaj krainy. Ale tady jon heta zrabiŭ u statusie miecenata, a nie biznesoŭca.
Upieršyniu viadomy amierykaniec adkryŭ dla siabie Biełaruś u 1992 hodzie i vosieńniu taho ž hoda asabista pabyvaŭ u Minsku, kab dać start adukacyjnym prajektam svajho Fondu Sorasa. Biełaruski filijał pačaŭ pracavać z 1993-ha, arhanizujučy sieminary dla dyrektaraŭ škoł, lekcyi z zaprašeńniem navukoŭcaŭ z ZŠA, pajezdki miascovych navukoŭcaŭ na simpoziumy i stažyroŭki za miažu. Fond całkam prafinansavaŭ centr pryvatyzacyi, jaki pavinien byŭ dapamahčy miascovym uładam u praviadzieńni raździaržaŭleńnia. Taksama jon stvaryŭ i padtrymlivaŭ takija prajekty, jak «mas-miedyja centr» i «Transfarmacyja humanitarnaj adukacyi».
Na pačatku 1995 hoda ŭ Džordža Sorasa adbyłasia aficyjnaja sustreča z Alaksandram Łukašenkam, zamiest zapłanavanych 45 chvilin jana doŭžyłasia zvyš dźviuch hadzin. Baki zastalisia zadavolenyja adzin adnym, i niekatory čas Biełaruski fond Sorasa aktyŭna dziejničaŭ. Ale ŭ 1997 hodzie amierykanski miljarder abviaściŭ pra spynieńnie ŭsialakaj dziejnaści na terytoryi našaj krainy.
