Apazicyjny Usiahrecki sacyjalistyčny ruch (PASOK), pavodle źviestak ekzit-pułaŭ, atrymaŭ pieramohu na parłamienckich vybarach u Hrecyi.
PASOK, jaki ŭznačalvaje Hieorhijas Papandreu-małodšy, nabiraje na niadzielnych parłamienckich vybarach u Hrecyi dastatkovuju kolkaść hałasoŭ, kab sfarmavać urad.
Sacyjalisty atrymali 43,6% hałasoŭ vybarcaŭ, što daje im prava na 158 deputackich miescaŭ z 300 miescaŭ u parłamiencie.
Kiraŭničaja Kansiervatyŭnaja partyja "Novaja demakratyja" byłoha premjera Kostasa Karamanlisa zmahła atrymać tolki 36,4% hałasoŭ (97 miescaŭ u parłamiencie).
Pierad Papandreu budzie nialohkaja zadača, jak vyvieści Hrecyju z ekanamičnaha, a to i palityčnaha kryzisu.
Darečy, hałasavańnie ŭ Hrecyi abaviazkovaje, ŭzrostavy cenz ad 18 da 70 hadoŭ, za ŭchileńnie ad hałasavańnia možna być pakaranym šaściu miesiacami turmy.
***
PASOK kiruje pradstaŭnik najstarejšaj u Hrecyi palityčnaj dynastyi Papandreu – Hieorhijas (Jorhas) Papandreu.
Jon praŭnuk paŭstanca 1863 h., uradženca Ašmianščyny Zyhmunta Miniejki.
Ad siaredziny 1870-ch, jak viadoma, Miniejka žyŭ u Hrecyi, dzie zajmaŭsia archieałahičnymi daśledavańniami, spryčyniŭsia da adnaŭleńnia Alimpijskich hulniaŭ dy zrabiŭ proćmu karysnych spravaŭ dla svajoj novaj Baćkaŭščyny. Miniejka ažaniŭsia z Prazerpinaj Manarys, a ich dačka Zofja stała žonkaj Hieorhijasa Papandreu-starejšaha (1888—1968) — viadomaha palityka, premjera ŭrada Hrecyi ŭ emihracyi (1944—1945), a taksama ŭ 1963—1965 hadach.
Syn Hieorhijasa — Andreas Papandreu (1919—1996) byŭ stvaralnikam PASOK, premjeram Hrecyi ŭ 1981—1989 i 1993—1996 hadach.
Hieorhijas Papandreu-małodšy — syn Andreasa Papandreu.Jon naradziŭsia ŭ 1952 h. u amierykanskim štacie Miniesota (horad Sent-Poł), dzie vučyŭsia ŭ vyhnańni jaho baćka. Hieorhijas atrymaŭ bliskučuju adukacyju, svabodna razmaŭlaje na anhlijskaj i šviedskaj movach.
U rozny čas byŭ ministram adukacyi i zamiežnych spraŭ, dvojčy ciarpieŭ parazu na parłamienckich vybarach u 2004 h. i 2007 h.
Hieorhijas Papandreu-małodšy - staršynia Sacyjalistyčnaha Internacyjanała.