«…Ščaście — unutry nas, i tolki ad nas zaležyć, być ščaślivymi ci nie. I procilehłaść ščaściu — nie niaščaście, a pošuki ščaścia.
Kali čałaviek raźbiarecca ŭ sabie, zrazumieje, chto jon, dla kaho i dla čaho, jamu praściej być ščaślivym.
…U suviazi z Bahdanovičam: zajmajučysia sportam, prydumaŭ nazvu dla fitnies-centra — «Krasa i siła». Moža, kamu prydasca, kali takoha jašče niama.
…Usia heta situacyja mocna mianiaje pohlady na žyćcio, na siabie, na tych, chto pobač. Kali my budziem znoŭ razam, my budziem tolki vielmi istotnymi rečami pierajmacca. A drobiazi jość drobiazi.
Kolki vakoł nas usiaho cikavaha, u čym chaciełasia b razabracca jak śled. I heta biezadnosna da jakasnaj charaktarystyki hetych dzion.
Ciomnyja niepahodnyja dni minajuć, a vializny cikavy śviet — i my ŭ im — praciahvajem isnavać i radavać nas.
…Dumaŭ pra toje, što pachi zdatnyja mocna zapaminacca i asacyjavacca ź niejkaj padziejaj. Ty pišaš, jak adčuła pach śviežaha harochu i ŭspomniła dziacinstva.
A ŭ mianie, naprykład, adzin z samych zapaminalnych i darahich pachaŭ dziacinstva — pach i ciapło traktarnaha ruchavika. Adrazu ŭspaminajecca dziadula Ivan, našy ź im pajezdki i razmovy.
…Usie čornyja pałosy ŭrešcie skančajucca, i ŭ pryncypie žyćcio — biaskoncy šerah źmien, kazali staražytnyja indyjskija fiłosafy. Kazaŭ užo, moža:
vielmi vialiki pracent rečaisnaści farmuje naša ŭsprymańnie. Dyk viedaj, što ja ŭsio ŭsprymaju spakojna i z aptymizmam, jak, spadziajusia, i vy».
