Fabryka «Kamunarka» źbirajecca ŭźvieści tut novy vytvorčy korpus pa pierapracoŭcy i zachoŭvańni kakava-baboŭ. Žycharoŭ mikrarajona zavuć na hramadskaje abmierkavańnie prajekta.
Havorka idzie ab stvareńni na 11 hiektarach inavacyjnaj impartazamiaščalnaj vytvorčaści poŭnaha cykła pierapracoŭki kakava-baboŭ. Placoŭka, dzie moža raźmiaścicca vytvorčaść, znachodzicca ŭ rajonie vulicy Hierasimienki, 57, — u miežach vulic Ilimskaj, Anharskaj i zavułka Bałotnikava.
Inicyiruje hramadskaje abmierkavańnie architekturna-płanirovačnaj kancepcyi abjekta administracyja Zavodskaha rajona Minska. Jano projdzie z 28 listapada pa 12 śniežnia.
Zhodna z prajektam, na ŭskrainie Minska moža źjavicca novy vytvorčy korpus pa pierapracoŭcy i zachoŭvańni kakava-baboŭ, a taksama linija pa vytvorčaści kandytarskich vyrabaŭ i składskija pamiaškańni.
Adznačajecca, što budaŭnictva inavacyjnaj vytvorčaści dazvolić ažyćciavić poŭnaje impartazamiaščeńnie kakava-praduktaŭ (kakava ciortaja, kakava-alej, kakava-parašok), što ŭvoziacca na terytoryju Biełarusi, zabiaśpiečyć patrebnaść u paŭfabrykatach pierapracoŭki kakava-baboŭ dziejučuju vytvorčaść SAAT «Kamunarka», a taksama inšyja biełaruskija pradpryjemstvy.
Novy vytvorčy korpus budzie miežavać z sadovym tavarystvam «Dražnia», z pryvatnaj zabudovaj na Anharskaj, sa šmatpaviarchovikami na Ilimskaj, a taksama ź lasnym masivam i inšymi vytvorčaściami, raźmieščanymi ŭ Zavodskim rajonie.
Aznajomicca z materyjałami hramadskaha abmierkavańnia možna budzie na sajcie administracyi Zavodskaha rajona ci niepasredna ŭ budynku administracyi na vulicy Žyłunoviča, 17.
