Viarchoŭny sud Biełarusi 12 kastryčnika pačaŭ razhlad kryminalnaj spravy, viadomaj jak «palaŭničaja», u dačynieńni da słužbovych asob MUS. Słuchańni prachodzić u zakrytym režymie.
Fihurantami kryminalnaj spravy źjaŭlajucca byłyja načalnik hałoŭnaha ŭpraŭleńnia pa baraćbie z karupcyjaj i ekanamičnymi złačynstvami MUS Viktar Jermakoŭ, načalnik UBKiEZ UUS Homielskaha abłvykankama Alaksandr Małajeŭ, načalnik UBKiEZ SN UUS Homielskaha abłvykankama Dźmitryj Baranaŭ i načalnik ABKiEZ Žłobinskaha RAUS Leanid Miniankoŭ.
Usie jany abvinavačvajucca ŭ pieravyšeńni ŭłady (art. 426 KK).
U kryminalnaj spravie fihurujuć taksama inšyja hramadzianie, jakija abvinavačvajucca ŭ niezakonnym palavańni (razmova idzie ab zdabyčy jeŭrapiejskaj rysi, zaniesienaj u Čyrvonuju knihu) i biaździejańni słužbovych asob. Sprava ab niezakonnym palavańni i pieravyšeńni ŭłady abjadnanyja ŭ adnu vytvorčaść.
Upieršyniu biełaruskaja hramadskaść daviedałasia ab «palaŭničaj spravie» 29 krasavika. Na naradzie, pryśviečanaj pracy pravaachoŭnych orhanaŭ, Alaksandr Łukašenka paviedamiŭ: «U pole zroku KDB niadaŭna trapiŭ načalnik adździeła pa baraćbie z karupcyjaj i ekanamičnymi złačynstvami Žłobinskaha RAUS Leanid Miniankoŭ, jaki arhanizavaŭ umovy dla zaniaćcia palavańniem, rybałkaj i jašče čymści. Ustanoŭlena, što ŭ 2003 hodzie jon nabyŭ i aformiŭ na padstaŭnuju asobu siadzibu płoščaj bolš jak dva hiektary na terytoryi Žłobinskaha rajona, zachapiŭšy pry hetym jašče bolš za adzin hiektar lasnych uhodździaŭ, samavolna ŭźvioŭ 14 pabudoŭ, abzavioŭsia zhrajaj z 29 parodzistych sabak i tryma dzikami. Usiu hetuju haspadarku absłuhoŭvali miascovyja žychary. Na ŭłasnaj bazie rehularna prachodziła palavańnie, rybałka z udziełam kiraŭnikoŭ, u tym liku Biełaruskaha mietałurhičnaha zavoda i vysokapastaŭlenych słužbovych asob orhanaŭ unutranych spraŭ, naprykład načalnika hałoŭnaha ŭpraŭleńnia pa baraćbie z karupcyjaj i ekanamičnymi złačynstvami MUS Jermakova».
Načalniki ŭpraŭleńniaŭ i adździeła pa baraćbie z karupcyjaj i ekanamičnymi złačynstvami byli zatrymanyja supracoŭnikami KDB u krasaviku 2009 hoda. Da suda jany znachodzilisia pad aryštam u SIZA KDB. Viktar Jermakoŭ znachodziŭsia pad padpiskaj ab niavyjeździe.
Zhodna z materyjałami kryminalnaj spravy, Jermakoŭ abvinavačvajecca ŭ tym, što jon daŭ ukazańnie svaim padnačalenym Małajevu, Baranavu i Miniankovu sabrać kampramietujučyja materyjały na supracoŭnikaŭ orhanaŭ dziaržbiaśpieki. Jaho padnačalenyja abvinavačvajucca ŭ tym, što pieravyšali ŭładu i pravodzili apieratyŭnyja mierapryjemstvy z metaj zboru kampramatu na supracoŭnikaŭ KDB.
Pierad aryštam Małajeŭ padrychtavaŭ videazvarot da prezidenta Biełarusi, jaki źjaviŭsia ŭ interniecie paśla jaho zatrymańnia. U zvarocie Małajeŭ prosić prezidenta «spynić biaźmiežža KDB u Homielskaj vobłaści». Z hetaj ža metaj svajaki abvinavačvanych milicyjanieraŭ źviartalisia nieadnarazova da kiraŭnictva MUS, KDB i prakuratury, u Administracyju prezidenta, u mižnarodnyja struktury.
