Niekalki apošnich dzion adnoj z asnoŭnych navinaŭ bolšaści elektronnych srodkaŭ masavaj infarmacyi źjaŭlajecca pachavańnie rasijskaha kryminalnika Viačasłava Ivańkova («Japončyka»).
Ivańkoŭ, jakomu było 69 hod, pamior 9 kastryčnika u maskoŭskim špitali, tak i nie ačuniaŭšy ad ranieńniaŭ. Ahniastrelnyja ranieńni byli im atrymanyja padčas napadu 28 lipienia ŭ Maskvie. Uletku navina ab zamachu na jaho taksama ablacieła ŭvieś śviet. U čym ža pryčyna takoj viadomaści i papularnaści?
Pryčyna ŭ tym, što Ivańkoŭ byŭ nie prosta hramadzianinam Viačasłavam Ivańkovym. Jon byŭ kryminalnym aŭtarytetam, tak zvanym «złodziejem u zakonie», jaki raźmiarkoŭvaŭ hrašovyja płyni, padkantrolnyja raznastajnym kryminalnym strukturam. I hetaha było dastatkova,
kab pra śmierć Ivańkova pisali ŭsie. I jak pisali!
Papularnaje rasijskaje internet‑vydańnie lenta.ru ŭ vialikim artykule apisvaje usie drabnicy, źviazanyja z zamacham i pachavańniem V. Ivańkova. Pryvodzić słovy śledčych, jakija nazyvajuć hetaha kryminalnaha aŭtaryteta nie inačaj, jak «achviaraj sutyknieńnia śfier intaresaŭ kryminalnych hrupovak». U materyjale, padadzienym lenta.ru, taksama raspaviadajecca ab vyklučna mirnych metach vizitu Ivańkova ŭ Maskvu. Jon, nibyta, pavinien byŭ ułahodzić kanflikt pamiž roznymi hrupoŭkami.
Inšy papularny rasijski resurs — RIA naviny — paviedamlaje, što na pachavańni V. Ivańkova prysutničali VIP‑piersony i viadomyja rasijskija estradnyja artysty, ź jakimi jon siabravaŭ. Akramia niepasredna paviedamleńnia ab śmierci i pachavańni, RIA Naviny daje padrabiazny analiz kryminalnaj situacyi ŭ Rasii, a taksama sprabuje razabracca, kamu była vyhadnaja śmierć Ivańkova. Nazyvajučy mnostva imionaŭ raznastajnych kryminalnych aŭtarytetaŭ. Pra ich viadoma amal usio, adnak bošaść z hetych ludziej žyvuć na voli.
A bolš za ŭsio ŭražvaje navat nie hetaje prychavanaje ŭchvaleńnie, jakim achutałasia śmierć kryminalnaha aŭtaryteta Ivańkova. U siecivie źjavilisia fotazdymki z pachavańnia. Tam mnostva ludziej z kvietkami pryjšło pravieści ŭ apošni šlach zabitaha.
Pobač z trunoj jany niasuć vialiki rasijski trykałor, jakim paźniej nakryjuć damavinu. Byccam chavajuć nie kryminalnika, a hieroja.
I hetyja fotazdymki pieradrukoŭvajuć i pieradrukoŭvajuć. Tamu što lubaja navina z paznakaj «japončyk» budzie dobra čytacca, prahladacca i kamientavacca. Navat u Biełarusi sprabujuć dałučycca da «słavy hieroja».Niekatoryja ŚMI šukali jaho biełaruskija ślady.
Voś takija vartaści, tak by mović, u zakonie. Možna, viadoma, zaŭvažyć, što heta zbolšaha rasijskija ŚMI tak adreahavali na śmierć Ivańkova. Tolki šalonaja papularnaść rasijskich kryminalnych sieryjałaŭ u Biełarusi śviedčyć zusim ab inšym. I adroźnivać hierojaŭ ad bandytaŭ stanovicca ŭsio składaniej. Pryčym nie tolki ŭ sieryjałach.
