Druhi dzień zapar u Biełarusi adznačajucca značnyja tempieraturnyja kantrasty. Na zachadzie krainy było krychu vyšej za nul, a na ŭschodzie — amal letniaje ciapło.
Jak paviedamili ŭ Respublikanskim hidramieteacentry, dniom 14 kastryčnika maksimalnaja tempieratura pavietra skłała ad plus 1,2 hradusa ŭ Vysokim i 1,7 u Ašmianach da 17,4 u Kaściukovičach i 17,9 u Mścisłavie.
Siarod abłasnych centraŭ chaładniej za ŭsio było ŭ Breście (2,2 hradusa) i Hrodnie (2,3), ciaplej za ŭsio — u Homieli (15,4) i Mahilovie (15,5). U Minsku słupok termomietra ŭźniaŭsia da adznaki plus 5,6 hradusa.
13 kastryčnika raźbiežka dzionnych tempieratur skłała ad plus 1,6 hradusa ŭ Vałožynie da 17 hradusaŭ u Brahinie. U noč na 14 kastryčnika było ad minus 0,3 u Navahrudku i Łyntupach da plus 15,4 u Homieli. Značnyja kantrasty naziralisia dniom 8 kastryčnika (ad 8,5 hradusa ciapła ŭ Šarkoŭščynie da 25 u Lelčycach) i 9 kastryčnika (ad 8 u Jeziaryščy da 20 u Babrujsku).
Intensiŭnaść apadkaŭ u sieradu źniziłasia. Kali dniom 13 kastryčnika ich kolkaść dasiahała 50 mm (u Žłobinie, dzie vypała miesiačnaja norma), a ŭ noč na 14 kastryčnika — 48 mm (Jeziaryšča, 89% miesiačnaj normy), to dniom 14 kastryčnika — nie bolš za 20 mm (Šarkoŭščyna, 38% miesiačnaj normy).
U šerahu rajonaŭ u sieradu adznačaŭsia štarmavy viecier paryvami da 25 m/s (u Vałožynie).
Sa źnižeńniem aktyŭnaści cykłona chutkaść vietru i intensiŭnaść apadkaŭ buduć źmianšacca. 15 kastryčnika čakajecca ad 2 da 7 hradusaŭ ciapła, pa ŭschodzie da 9.
