Fota: BiełTA
Pravaabaroncaŭ abvinavačvajuć u «kantrabandzie arhanizavanaj hrupaj» (č. 4 art. 228 KK) i «finansavańni hrupavych dziejańniaŭ, jakija hruba parušajuć hramadski paradak» (č. 2 art. 342 KK). Troje viasnoŭcaŭ utrymlivajucca pad vartaj z 14 lipienia 2021 hoda — im pahražaje ad 7 da 12 hadoŭ źniavoleńnia.
Spravu razhladaje sudździa Maryna Zapaśnik, a dziaržaŭnaje abvinavačvańnie padtrymlivaje prakuror Alaksandr Karol.
Aleś Bialacki, Valancin Stefanovič i Uładzimir Łabkovič nie pryznali vinu ni pa adnym artykule Kryminalnaha kodeksa, jakija im staviacca ŭ vinu.
5 studzienia dapytali zasnavalnika i hałoŭnaha redaktara «Narodnaj voli» Iosifa Siaredziča i začytali pakazańni pravaabaroncy Aleny Łapcionak. Astatnija śviedki na sud nie źjavilisia. Viadoma, što była zajaŭlena taksama hałoŭnaja redaktarka «Novaha času» Aksana Kołb.
6 studzienia na sudzie praciahvajecca dopyt śviedak. Siońnia dapytali hałoŭnaha redaktara vydańnia «Svabodnyja naviny plus» Vasila Zdaniuka. Jon na sudzie paviedamiŭ sudu, što atrymlivaŭ hrošy ad Aleny Łapcionak za publikacyju artykułaŭ, aŭtarstva supracoŭnikaŭ pravaabarončaha centra.
Śviedku pradjavili raśpiski, zhodna ź jakimi jamu pieradavalisia sumy bolš za dźvie tysiačy jeŭra, ale jon tolki ździviŭsia im i aburyŭsia, bo takija sumy jon nie atrymlivaŭ nikoli.
Praz toje, što hałoŭnuju redaktarku «Novaha Času» Aksanu Kołb nie zmahli dapytać na sudzie asabista, bo jana była vymušana pakinuć Biełaruś praź pieraśled, začytali jaje pakazańni, dadzienyja padčas śledstva. U materyjałych spravy taksama nazyvajucca vydańni «Narodnaja vola», «Bresckaja hazieta», «6TVbaj».
***
Pa spravie ŭsiaho 283 tamy materyjałaŭ pa 300 staronak — heta rekord pa palityčnaj spravie, pa jakoj prachodzić kala 100 śviedak, było praviedziena 120 pieratrusaŭ pa ŭsioj krainie.
60-hadovy Aleś Bialacki nie pieršy raz za kratami. Ułady ŭžo aryštoŭvali jaho na pačatku 2010-ch. Pravaabarončy centr «Viasna» Bialacki stvaryŭ u 1996-m i dahetul zastajecca jaho kiraŭnikom.
Letaś pravaabaronca staŭ łaŭreatam Nobieleŭskaj premii miru razam z pradstaŭnikami pravaabarončych arhanizacyj «Miemaryjał» z Rasii i «Centr hramadzianskich svabod» z Ukrainy. Jon nie zmoh trapić na cyrymoniju — pramovu Bialackaha na ŭručeńni «Nobiela» začytała jahonaja žonka.
Adras dla listoŭ salidarnaści:
SIZA-1, 220030, Minsk, Vaładarskaha, 2, Uładzimir Mikałajevič Łabkovič, Alaksandr Viktaravič Bialacki, Valancin Kanstancinavič Stefanovič.
Pačaŭsia sud nad «Viasnoj»: pieršyja za paŭtara hoda FOTA i VIDEA Bialackaha i kaleh. Jany patrabujuć, kab sud išoŭ pa-biełarusku
«Dabro i praŭda pavinny ŭmieć abaraniać siabie». Nobieleŭskaja pramova Alesia Bialackaha POŬNY TEKST
