Hramadzianin Biełarusi Maksim Ziaziulčyk, jakoha letaś u vieraśni ŭziali ŭ pałon ukrainskija vajskoŭcy pry vyzvaleńni ad rasijskich akupantaŭ Limanskaha rajona Danieckaj vobłaści, asudžany na 10 hadoŭ pazbaŭleńnia voli — maksimalny termin, praduhledžany pavodle vystaŭlenych jamu abvinavačvańniaŭ va ŭdziele ŭ jakaści najmita va ŭzbrojenym kanflikcie, vajennych abo hvałtoŭnych dziejańniach (č. 4 artykuła 447 Kryminalnaha kodeksa Ukrainy).
Aprača taho, zhodna z vyrakam, Maksim Ziaziulčyk musić kampiensavać 1372 hryŭni (amal 35 dalaraŭ u ekvivalencie. — RS), jakija spatrebilisia na apłatu pracy ekśpierta pry praviadzieńni sudovych ekśpiertyz.
Zhodna z ukrainskim zakanadaŭstvam, Maksim Ziaziulčyk moža abskardzić hety vyrak da 18 lutaha. Na sudovym pasiadžeńni jon zajaviŭ, što pryznaje svaju vinu i škaduje ab svaich supraćpraŭnych učynkach.
Maksim Ziaziulčyk naradziŭsia ŭ Rudziensku Puchavickaha rajona Minskaj vobłaści. Słužyŭ u padraździele «Vieterany» kulamiotnikam-retranślataram z 21 lipienia. Da 25 žniŭnia jon znachodziŭsia na pazicyjach sił Rasii ŭ akupavanym horadzie Iziumie Charkaŭskaj vobłaści.
Bataljon «Vieterany» — padraździeł pryvatnaj vajskovaj kampanii «Redut», jakaja spačatku nie ŭdzielničała ŭ bajavych dziejańniach, a vykonvała funkcyju achovy abjektaŭ.
Maksim Ziaziulčyk udzielničaŭ u bajach kala Krasnapolla ŭ Danieckaj vobłaści. U čas bajoŭ za pazicyi ŭ lesapałasie Duby 30 lipienia jon byŭ paranieny i da 25 žniŭnia lačyŭsia na bazie stałaj dysłakacyi «Reduta» ŭ Iziumie Charkaŭskaj vobłaści.
25 žniŭnia ŭ składzie bataljona «Vieterany» jaho pierakinuli na pazicyi kala Svatava ŭ Łuhanskaj vobłaści, dzie išli najbolš žorstkija bai. Paźniej rasijanie pierakinuli hety padraździeł u Limanski rajon Danieckaj vobłaści.
Urešcie 19 vieraśnia Maksim Ziaziulčyk trapiŭ u pałon da ŭkrainskich vajskoŭcaŭ.
Ukraincy ŭziali Maksima Ziaziulčyka ŭ pałon razam ź jahonym kulamiotam. Pavodle sudovaha rašeńnia, kulamiot pieradaduć Dziaržaŭnamu navukova-daśledčamu ekśpiertna-kryminalistyčnamu centru MUS Ukrainy ŭ kalekcyju zbroi i vykarystańnia ŭ ekśpiertnaj i navukovaj dziejnaści.
Raniej pałonny biełarus paviedamiŭ ukrainskamu boku, što pavodle kantraktu jon mieŭ atrymlivać 3600 dalaraŭ na miesiac. Aproč taho, jamu abiacali 100% nadbaŭki za invalidnaść. Z vyraku suda stała viadoma, što pry padpisańni kantrakta jahonaje žyćcio zastrachavali na 60 tysiač dalaraŭ, jakija, peŭna, pavinny byli atrymać svajaki ŭ vypadku jahonaj hibieli.
Na vajnu va Ukrainu Maksim Ziaziulčyk trapiŭ praz try dni paśla vučeńniaŭ na palihonie «Tryhulaj» u Tamboŭskaj vobłaści Rasii.
Uziali ŭ pałon pieršaha biełarusa, jaki vajavaŭ na baku Rasii. Pavajavaŭ jon mienš za dva miesiacy
