Fota: BiełTA
Dziaržaŭnaje abvinavačvańnie ličyć, što vina pravaabaroncaŭ pavodle č. 4 art. 228 (kantrabanda arhanizavanaj hrupaj) i č. 2 art. 342 Kryminalnaha kodeksa (finansavańnie hrupavych dziejańniaŭ, jakija hruba parušajuć hramadski paradak) całkam dakazanaja.
Alaksandr Karol zapytaŭ nastupnyja terminy dla viasnoŭcaŭ:
dla staršyni «Viasny» i Nobieleŭskaha łaŭreata Alesia Bialackaha — 12 hadoŭ kałonii;
dla namieśnika staršyni «Viasny» i vice-prezidenta FIDH Valancina Stefanoviča — 11 hadoŭ kałonii;
dla kaardynatara kampanii «Pravaabaroncy za svabodnyja vybary» Uładzimira Łabkoviča — 9 hadoŭ kałonii;
dla pravaabaroncy «Viasny» Dźmitryja Sałaŭjova — 10 hadoŭ kałonii zavočna.
Taksama prakuror Alaksandr Karol prapanavaŭ aštrafavać pravaabaroncaŭ na piać tysiač bazavych vieličyń (185 tysiač rubloŭ ci 73200 dalaraŭ) kožnaha.
***
Troje viasnoŭcaŭ utrymlivajucca pad vartaj z 14 lipienia 2021 hoda.
Pa spravie ŭsiaho 283 tamy materyjałaŭ pa 300 staronak — heta rekord pa palityčnaj spravie, pa jakoj prachodzić kala 100 śviedak, było praviedziena 120 pieratrusaŭ pa ŭsioj krainie.
60-hadovy Aleś Bialacki nie pieršy raz za kratami. Ułady ŭžo aryštoŭvali jaho na pačatku 2010-ch. Pravaabarončy centr «Viasna» Bialacki stvaryŭ u 1996-m i dahetul zastajecca jaho kiraŭnikom.
Letaś pravaabaronca staŭ łaŭreatam Nobieleŭskaj premii miru razam z pradstaŭnikami pravaabarončych arhanizacyj «Miemaryjał» z Rasii i «Centr hramadzianskich svabod» z Ukrainy. Jon nie zmoh trapić na cyrymoniju — pramovu Bialackaha na ŭručeńni «Nobiela» začytała jaho žonka.
Adras dla listoŭ salidarnaści:
SIZA-1, 220030, Minsk, Vaładarskaha, 2, Uładzimir Mikałajevič Łabkovič, Alaksandr Viktaravič Bialacki, Valancin Kanstancinavič Stefanovič.
