Fota: vecteezy
Kamanda navukoŭcaŭ z Univiersiteta Karniehi — Miełana raspracavała novy mietad dla vyjaŭleńnia trochmiernaj formy i ruchu čałaviečych cieł, vykarystoŭvajučy tolki WiFi-roŭtary. Adpaviednaje daśledavańnie było apublikavana 31 śniežnia minułaha hoda na sajcie archiva Karnielskaha ŭniviersiteta.
Pry raspracoŭcy hetaha mietadu navukoŭcy vykarystoŭvali DensePose — sistemu dla adlustravańnia ŭsich piksielaŭ na pavierchni čałaviečaha cieła pa fatahrafijach. Zatym u chod pajšła navastvoranaja niejrasietka, zdolnaja supastaŭlać sihnały WiFi-roŭtara z kaardynatami čałavieka.
U vyniku atrymałasia stvaryć novuju sistemu sačeńnia, jakaja vyklučna pry dapamozie WiFi moža adlustroŭvać adrazu niekalkich čałaviek u farmacie sapraŭdnych trochmiernych vyjaŭ. Adnak taki sposab nazirańnia ciapier pracuje tolki minimum z dvuma roŭtarami ŭ maleńkich zamknionych pamiaškańniach.
Kampjutarnaje bačańnie i raspaznavańnie vyjaŭ pry dapamozie Wifi razam z prahramaj DensePose. Fota: vizualny prykład z daśledavańnia Univiersiteta Karniehi — Miełana, arxiv.org/abs/2301.00250
«Vykarystańnie WiFi dazvalaje paźbiehnuć niehatyŭnych faktaraŭ drennaha aśviatleńnia i zacianieńnia, ź jakimi sutykajucca zvyčajnyja kamiery. Heta prakładaje šlach da niedarahich i šyroka raspaŭsiudžanych ałharytmaŭ raspaznavańnia čałavieka», — adznačajuć navukoŭcy.
Razam z hetym jany zajaŭlajuć, što takaja technałohija adnačasova pryznačanaja dla «abarony pryvatnaści ludziej», i pryvodziać nastupnyja arhumienty:
«Naprykład, bolšaść ludziej niajomka adčuvaje siabie, kali kamiery zapisvajuć ich va ŭłasnych damach, a ŭ niekatorych miescach (naprykład, u vannym pakoi) ustanoŭka kamier uvohule niedapuščalnaja. Heta staŭleńnie asabliva krytyčnaje ŭ halinie achovy zdaroŭja, jakaja ŭsio bolš pierachodzić z klinik u damy, dzie za ludźmi nazirajuć z dapamohaj kamier i inšych datčykaŭ. Važna abyści hety niedavier da sačeńnia, kab lepš dapamahčy ŭraźlivym hrupam nasielnictva».
«Faktyčna, bolšaść damoŭ u raźvitych krainach užo maje WiFi, i hetuju technałohiju možna raspaŭsiudžvać dla manitorynhu dabrabytu pažyłych ludziej abo vyjaŭleńnia padazronych pavodzin doma», — pryvodziać u jakaści dokazaŭ navukoŭcy.
Pry hetym jany nie ŭdakładniajuć, što padpadaje pad paniaćcie «padazronyja pavodziny» i što budzie, kali hetaja raspracoŭka trapić nie ŭ tyja ruki.
Čytajcie jašče:
«Jak tabie takoje, Iłan Mask?»: u sistemy Starlink chutka źjavicca novy kankurent
Važna viedać. Jakim čynam represiŭnyja orhany dastajuć užo vydalenuju infarmacyju z Telegram i što možna z hetym zrabić?
U Google Maps možna schavać častki vašaha doma, jakija vy nie chočacie, kab bačyli čužyja — voś jak heta zrabić
