U Biełarusi zvyčajna pačynajuć kasić travu ŭ kancy krasavika — pačatku maja, kali trava dasiahaje vyšyni kala 10—15 sm. Adnak kankretny momant zaležyć ad klimatyčnych umoŭ u biahučym hodzie i ad rehijona krainy, tamu lepš aryjentavacca na stan travy, a nie tolki na kalandar. U lubym vypadku rehularnaja kaśba travy dapamahaje padtrymlivać vyhlad učastka i spryjaje rostu bolš zdarovaj travy.
Padrychtoŭka da kaśby
Pierad pačatkam kaśby z učastka prybirajuć usie pradmiety, jakija mohuć narabić škody jak instrumientu, tak i ŭładalniku (sadovyja fihurki, kamieńčyki, halinki, raskidanyja dziciom cacki i h. d.). Rekamiendujecca pavyryvać usio pustazielle, prajścisia pa hazonie z hrablami ci miaciołkaju z žorstkimi prutami dla taho, kab vybrać suchuju travu ci moch, razrychlić hlebu. Hetaja pracedura abaviazkovaja pry pieršaj kaśbie i pierad zimoju.
Kali trava pasiejanaja ŭ tym ža hodzie, to pry pieršaj kaśbie zrazajuć tolki vierchaviny na 1—2 sm. Heta dapamoža joj kuścicca i stać bolš hustoj.
Adnak nie treba śpiašacca ź pieršaj kaśboj jak maładoha hazona, tak i staroha. Zatrymka kašeńnia viasnoju na niekalki tydniaŭ, jak adznačajuć śpiecyjalisty-bijołahi, pavialičvaje vidavuju raznastajnaść hazonaŭ, bo trava — heta schovišča dla nasiakomych, a kvietki — ich ježa.
Pry praviadzieńni rehularnaj kaśby vučonyja rajać pakidać niekatoryja ŭčastki hazonaŭ niekranutymi. Heta źnizić niehatyŭnaje ŭździejańnie kaśby na žyviolny śviet, bo buduć zachavanyja kvietki i raśliny, dziakujučy jakim jany charčujucca.
Kali hazon pieraros, to nie śpiašajciesia adrazu ŭsio skasić «pad korań». Lepš pravieści stryžku za 2—3 razy na praciahu niekalkich dzion, pačaŭšy z ukaračeńnia na adnu treć. Heta daść travie čas adaptavacca.
Kali kasić
Lepš za ŭsio kasić travu ŭ pachmurny, ale nie daždžlivy dzień. U takich umovach trava lepš adaptujecca da paškodžańniaŭ. Nie varta kasić travu ŭ mocna śpiakotny dzień, kali jana pierasochła, bo heta moža pryvieści da paškodžańnia karanioŭ i paharšeńnia jaje zdaroŭja. Lepš za ŭsio pracavać zranku ci viečaram.
Kab paźbiehnuć paškodžańnia karanioŭ i atrymać bolš roŭny vynik, rekamiendujecca vykarystoŭvać vostry instrumient i mianiać napramak kaśby. Spačatku prachodziacca pa travie ŭzdoŭž, a nastupnym razam — upapiarok. Tak atrymajecca roŭnaja pavierchnia.
Nie treba kasić travu i ŭ pieryjady, kali pahražaje zasucha. Heta dapamoža ŭtrymać vadu ŭ hlebie. Śpiecyjalisty rajać skošvać travu tolki ŭ miescach, dzie heta nieabchodna, naprykład, pa mierkavańniach biaśpieki.
Jak časta kasić i na jakuju vyšyniu
Pieryjadyčnaść kaśby zaležyć ad pary hoda i ŭmoŭ nadvorja.
Zvyčajna ŭviesnu, kali trava znachodzicca ŭ pieryjadzie aktyŭnaha rostu, heta robiać raz ci dva razy na tydzień. Letam kosiać raz na 10 dzion, a ŭvosień — raz na dva tydni ci radziej.
Vyšynia kaśby zaležyć ad vidu hazona.
Apošnija hady siarod uładalnikaŭ prysiadzibnych učastkaŭ nabyvaje papularnaść tak zvany maŭrytanski hazon, na jakim razam z travoju raście šmat łuhavych kvietak. Taki hazon patrabuje kaśby dva razy na hod, kab raśliny paśpiavali davać nasieńnie.
Što rabić sa skošanaju travoju
Kali trava nie źbirajecca ŭ śpiecyjalny adsiek hazonakasiłki, to ŭ suchoje i haračaje nadvorje jaje lepš pakinuć raskidanaju. Tak jana papracuje ŭ jakaści mulčy.
Kali ž čakajucca daždžy ci staić vilhotnaje nadvorje, travu varta prybrać. U advarotnym vypadku jana pačnie hniści, budzie pieraškadžać vyparvacca lišniaj vilhaci i stanie miescam dla rostu hrybkoŭ.
Z maŭrytanskaha hazona travu abaviazkova prybirajuć.
Čytajcie jašče:
Ćvicie višnia — para sadzić bulbu
Abrazajecie sad? Nie śpiašajciesia vykidać halinki drevaŭ i kustoŭ
Krapiva, miedunica, makryca dy inšaje pustazielle, jakoje ŭzbahacić vaš stoł
