Na pres‑kanfierencyi, pryśviečanaj aficyjnamu vizitu prezidenta Kazachstana Nursułtana Nazarbajeva ŭ Biełaruś, pasoł hetaj krainy, Anatol Śmirnoŭ, paviedamiŭ, što raspracoŭvajucca płany pastaŭki ŭ našu krainu kazachskaj nafty dla jaje dalejšaj pierapracoŭki ŭ Biełarusi.
Pavodle sp. Śmirnova, heta stanie mahčyma, kali pačnie pracu Mytny sajuz Biełarusi, Kazachstana i Rasii. U vyniku ŭviadzieńnia ahulnych mytnych pošlin, transparciroŭka nafty z Kazachstana ŭ Biełaruś praz terytoryju Rasii stanie rentabielnaj.
Pasoł Kazachstana taksama pierakanany, što ŭviadzieńnie ahulnaj mytnaj prastory dazvolić davieści ahulny tavarazvarot pamiž našymi krainami da 5 młrd. dalaraŭ (zaraz jon nie dasiahaje i adnaho miljarda).
«Mytny sajuz — heta samaja vysokaja stupień intehracyi. Klučavaja ideja jaho ŭviadzieńnia — źnižeńnie mytnych pieraškod u handli pamiž našymi krainami», ‑‑ adznačyŭ pasoł. Adkazvajučy na pytańnie ab pavyšeńni myta na ŭviezienyja aŭtamabili, pasoł Kazachstana zaŭvažyŭ, što mytny sajuz u pierśpiektyvie «budzie acenieny nasielnictvam usich krain, bo pryniasie tolki prybytak».
