Košt 1 dalara ŭ biełaruskich rublach za tydzień pavialičyŭsia na 5 kapiejek.
26 červienia amierykanskaja valuta pierasiahnuła simvaličnuju płanku ŭ try rubli.
30 červienia na tarhach valutna-fondavaj biržy dalar padros na 0,04 kapiejki. A dniom raniej ažno na 1,66 kapiejki. Siońnia 1 dalar pa kursie Nacbanka kaštuje 3,0315 biełaruskaha rubla.
Ekanamistka Nastaśsia Łuzhina tłumačyć, što asłableńnie biełaruskaha rubla treba źviazvać z abiasceńvańniem rasijskaha, jaki taksama prasiadaje adnosna dalara.
Pavodle jaje, biełaruski rubiel paŭtaraje tendencyju rasijskaha, ale ŭsio ž całkam jaje nie kapiruje.
Ekśpiertka davodzić, što karotkaterminovym faktaram, jaki paŭpłyvaŭ na ŭstojlivaść rasijskaj valuty, staŭ miaciež Pryhožyna. U vyniku rynki i inviestary zachvalavalisia, što adbiłasia na kursie valut.
Niehatyŭnyja nastupstvy ad pachodu «vahnieraŭcaŭ» na Maskvu zaznaŭ i biełaruski rubiel.
Na źnižeńnie kursu rasijskaha rubla ŭpłyvaje rost deficytu rasijskaha biudžetu, nastupstvam čaho stała, u tym liku, pavieličeńnie hrašovaj masy. Na jaho taksama ciśnie pavieličeńnie abjomaŭ paralelnaha impartu pry adnosna nievialikich cenach na enierhanośbity.
Nastaśsia Łuzhina miarkuje, što płaŭny rost kursu dalara da rasijskaha rubla, kali nie budzie kataklizmaŭ na palityčnaj arenie i dadatkovych sankcyj, zachavajecca.
U advarotnym vypadku inviestary bolš aktyŭna buduć układacca ŭ nadziejnyja valuty takija, jak dalar i jeŭra. Heta moža spravakavać bolš rezkaje źnižeńnie vartaści rasijskaj valuty.
Biełaruski rubiel taksama najchutčej budzie płaŭna prasiadać.
Ekanamistka kaža, što ciaham miesiaca mohuć być pieryjady ŭmacavańnia biełaruskaj valuty, asabliva kali eksparciory buduć pradavać valutu, kab raspłacicca z padatkami.
Padzieńnie rasijskaha rubla moža zapavolicca, kali buduć pavialičvacca ceny na enierhanośbity ci, naprykład, Centrabank pavysić klučavuju staŭku.
Anałahičnaja dynamika budzie tady naziracca i ź biełaruskim rublom.
Da kanca hoda da rasijskich faktaraŭ upłyvu na biełaruskuju valutu mohuć padklučycca ŭnutrybiełaruskija.
Nastaśsia Łuzhina nahadvaje, što ŭłada pastaviła zadaču naraścić VUP na 3,8% za košt unutranaha popytu i stymulavańnia inviestycyj.
«Hetyja tendencyi mohuć stymulavać impart. Tamu cisk na biełaruski rubiel moža ŭzraści z-za miakkaj kredytnaj i fiskalnaj palityki, što vyznačajuć umovy dla rostu hrašovaj masy i impartu».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Staŭki pa valutnych depazitach u biełaruskich bankach rezka źmianilisia proci minułaha hoda
Ekanamisty raspaviali, kolki biełarusaŭ pierabrałasia ŭ apošnija hady ŭ ES
