Fota: Pixabay.com
Supracoŭniki Ahienctva ŭnutranaj biaśpieki (ABW) zatrymali jašče adnaho, užo piatnaccataha čałavieka, jaki na terytoryi Polščy pavinien byŭ udzielničać u pracy špijonskaj sietki, jakaja pracuje na karyść Rasii, piša WNP.pl.
«Takim čynam, zatrymana ŭžo 15 čałaviek, jakim vystaŭlena abvinavačańnie va ŭdziele ŭ arhanizavanaj złačynnaj hrupie ŭ suviazi ź viadzieńniem špijonskaj dziejnaści», — havorycca ŭ paviedamleńni pres-słužby kaardynatara śpiecsłužbaŭ Stanisłava Žaryna.
U pres-słužbie Nacyjanalnaj prakuratury paviedamili, što zatrymany — hramadzianin Ukrainy, jaki znachodziŭsia na terytoryi Polščy z 2019 hoda.
Śledčyja ŭstanavili, što mužčyna naziraŭ za krytyčnaj infrastrukturaj, uklučajučy vajskovyja abjekty i marskija party. Jon pastajanna infarmavaŭ zakazčykaŭ ab vynikach praviedzienaj pracy, za što atrymlivaŭ uznaharodu.
Prakuror vystaviŭ zatrymanamu abvinavačańni ŭ dačynieńni da arhanizavanaj złačynnaj hrupy i dziejnaści na karyść zamiežnaj raźviedki suprać intaresaŭ Polskaj Respubliki.
«Dziejańni, učynienyja padazravanym, praduhledžvajuć pakarańnie da 10 hadoŭ pazbaŭleńnia voli», — rastłumačyli ŭ pres-słužbie prakuratury.
U kancy červienia ŭ Polščy pa hetaj spravie byŭ zatrymany rasijski chakieist.
U siaredzinie sakavika ŭ Polščy była znojdziena i likvidavana, pavodle polskaj prakuratury, rasijskaja špijonskaja sietka, jakaja sačyła za łahistyčnymi maršrutami pastavak zachodniaj zbroi Ukrainie i płanavała dyviersii. U jaje skład taksama ŭvachodziła troje hramadzian Biełarusi.
