15% apytanych panična bajacca ludziej, chvorych na ŚNID, kožny piaty adčuvaje da takich ludziej adčužeńnie.
Supracoŭniki Baranavickaha zanalnaha centra hihijeny i epidemijałohii padviali vyniki apytańnia, pryśviečanaha prablemam ŚNIDu. Apytańnie pakazała, što bolšaść žycharoŭ horadu tak i nie navučylisia ciarpima stavicca da nośbitaŭ VIČ-infiekcyi.
Pa słovach urača-epidemijołaha centra Eleanory Buhajovaj, z 100 apytanych haradžan 15% skazali, što jany panična bajacca ludziej, chvorych na ŚNID, jašče 20% ŭkazali na toje, što jany adčuvajuć da takich ludziej adčužeńnie. Bolš za toje, 70% apytanych kateharyčna zajavili ab tym, što nie žadajuć žyć pobač z takimi ludźmi i što ŭsich VIČ-infikavanych treba izalavać ad hramadstva.
Miedyki ž, u svaju čarhu, pierakonvajuć hramadzian, što dyskryminacyja chvorych na ŚNID nie dapuščalnaja.
Pa dadzienych Baranavickaha centra hihijeny i epidemijałohii, u pieryjad z 1997 pa 2009 hod ad ŚNIDu ŭ rehijonie pamierła 17 čałaviek. Adzin ź ich uradženiec Baranavickaha rajona, astatnija haradskija žychary.
Pa stanie na 1 listapada 2009 hoda ŭ Baranavickim rehijonie zarehistravana 82 vypadki VIČ-infiekcyi, 63 ź jakich — u horadzie Baranavičy.
Štohod u rehijonie virus znachodziać u 4-5 čałaviek. Bolšaść chvorych — maładyja ludzi va ŭzroście ad 20 da 29 hadoŭ.
Jak adznačyli miedyki, u śpisie chvorych niaznačna, ale pieravažajuć mužčyny (48 čałaviek). Pryčym, kali raniej nośbitami virusa źjaŭlalisia, u asnoŭnym, asacyjalnyja asoby, to zaraz śpisy infikavanych papaŭniajucca za košt zvyčajnych hramadzian. Niahledziačy na toje, što samym raspaŭsiudžanym šlacham pieradačy VIČ-infiekcyi ŭ rehijonie zastajecca injekcyjny siarod narkamanaŭ, u toj ža čas lekary adznačajuć, što ŭ apošni čas nazirajecca tendencyja pavieličeńnia kolkaści vypadkaŭ, kali ludzi nabyvajuć virus imunadeficytu pry pałavym kantakcie.
