Andrej Parotnikaŭ. Skrynšot videa ANT
Palitołaha Andreja Parotnikava ŭžo paŭhoda trymajuć u SIZA KDB. Jaho zatrymali ŭ sakaviku 2023 u Rasii i pad achovaj pryvieźli ŭ Biełaruś, nahadvaje «Radyjo Svaboda».
Jamu vystaŭlena abvinavačańnie ŭ zdradzie dziaržavie pavodle artykuła 356 Kryminalnaha kodeksa, pa jakim pahražaje da 15 hadoŭ źniavoleńnia.
«Jaho vinavaciać u zdradzie dziaržavie, ale śledstva idzie niejak vielmi dziŭna. Viedaju, što apošnija try miesiacy ničoha nie adbyvajecca, a sprava jašče nie zavieršanaja. Siadzić i čakaje», — raspaviała pra Andreja Parotnikava krynica, jakaja prasiła nie nazyvać jaje imia ŭ metach biaśpieki.
Jana paviedamiła niekatoryja źviestki pra ŭmovy ŭtrymańnia palitołaha.
«Znachodzicca ŭ zvyčajnaj kamiery, jak i inšyja. Na ŭmovy nie narakaje. Šmat čytaje. Zamoviŭ padručnik ispanskaj movy. Značyć płanuje pašyryć viedy pa zamiežnych movach», — kaža krynica.
Pavodle hetaj krynicy, suviaź z Andrejem Parotnikavym udajecca padtrymlivać rehularna.
«Da jaho dachodziać listy. Jamu nosiać pieradačy. Ad jaho dachodziać źviestki, što pačuvajecca narmalna».
Andrej Parotnikaŭ — kapitan milicyi zapasu. Paśla zvalnieńnia z MUS jon zajmaŭsia niezaležnaj analitykaj na temy biaśpieki i siłavych struktur. Kiravaŭ analityčnym centram Belarus Security Blog. Jaho aryštavali 19 sakavika 2023 hoda ŭ Rasii. Pavodle telekanała ANT, jaki ŭ žniŭni pakazaŭ admysłovy film pra «zdradu dziaržavie» z boku Andreja Parotnikava, zatrymańnie adbyłosia ŭ Smalensku. Pavodle krynicy, jakaja razmaŭlała z «Radyjo Svaboda», zatrymali palitołaha ŭ Maskvie.
Biełaruskija pravaabaroncy pryznali Andreja Parotnikava palitviaźniem.
Čytajcie taksama:
«Treba navučycca žyć raślinnym žyćciom». Fiłosaf Uładzimir Mackievič pieranios u turmie apieracyju
