Dźmitryj Pabiaržyn. Fota: Facebook
Chto taki Dźmitryj Pabiaržyn
Dźmitryj Pabiaržyn vystupaŭ u roli aficyjnaha śpikiera KDB u 2016—2017 hadach. Jaho reprezientavali jak kiraŭnika pres-słužby arhanizacyi.
Zatym na niekalki hadoŭ Pabiaržyn źnik z publičnaha pola. U pačatku 2020 hoda jon i pałkoŭnik KDB Andrej Milčanka stali ŭdzielnikami bojki ŭ kaviarni ŭ Homieli — byŭ źbity dyrektar ustanovy. U kamientary «Našaj Nivie» Pabiaržyn tady zajaviŭ, što jon «hetaha złačynstva nie ździajśniaŭ».
U lipieni 2020-ha adbyŭsia sud: asudžany byŭ tolki Milčanka, jamu dali 7 hadoŭ i pazbavili zvańnia pałkoŭnika. Ci panios jakoje-niebudź pakarańnie Pabiaržyn, nieviadoma.
Skrynšot ź videa z kamier u kaviarni ŭ Homieli, dzie ŭ 2020 hodzie adbyłasia bojka z udziełam supracoŭnikaŭ KDB (Dźmitryj Pabiaržyn — źleva). Fota: Komsomolskaja pravda
U jakim hodzie Pabiaržyn zvolniŭsia z KDB (i ci zvolniŭsia naohuł), dakładna nieviadoma. Nieviadoma i jahonaje zvańnie na momant mahčymaha zvalnieńnia. Belpol paviedamiŭ «Lusterku», što jon kiravaŭ pres-słužbaj KDB prykładna da 2018 hoda, zatym jaho panizili na pasadzie.
«Pabiaržyn byŭ pieraviedzieny na nižejšuju pasadu zahadam staršyni KDB z-za «niapravilnaha afarmleńnia dakumientacyi pa kamandzirovačnych vydatkach u zamiežnaj kamandziroŭcy», — raskazali krynicy Belpol. — Jon pakazaŭ niapravilnyja źviestki i atrymaŭ lišnija hrošy, padrabiaznaści ŭ zahadzie nie raśpisvalisia. Pa hetaj situacyi pravodziłasia słužbovaje rasśledavańnie Upraŭleńniem ułasnaj biaśpieki KDB».
15 maja 2023 hoda Dźmitryj Pabiaržyn raźmiaściŭ na vokładku svajoj staronki ŭ Facebook emblemu hulniavoj kampanii GameMod. Z tych časoŭ u Facebook i LinkedIn jon pradstaŭleny jak jaje kiraŭnik (SIEA) i zasnavalnik.
Staronka Dźmitryja Pabiaržyna ŭ LinkedIn
Hiejmdzieŭ — kampanija z ofisam u Polščy i niezvyčajnymi ŭłaśnikami
Miarkujučy pa vypiscy z ADR, u TAA «HiejmMod» dva ŭłaśniki. 60% jurydyčnaj asoby naležyć Dźmitryju Pabiaržynu, 40% — Anatolu Puško.
Skrynšot vypiski na TAA «HiejmMod» z ADR
Takija ž ułaśniki ŭ polskaj SOO Gamemod. U joj doli ŭłasnaści pamiž Pabiaržynym i Puško padzielenyja paroŭnu.
Profil kampanii SOO Gamemod u rejestry jurydyčnych asob Polščy. Skrynšot: rejestr.io
Anatol Puško ŭznačalvaje jašče adnu kampaniju — «Płastma-Kansałt». Jana budavała ŭ Biełarusi drevaapracoŭčyja zavody i ŭdzielničała ŭ madernizacyi abjektaŭ celułozna-papiarovaj pramysłovaści. U LinkedIn možna znajści Arciemija Puško, jaki padpisany jak saŭładalnik GameMod. Mahčyma, heta syn Anatola.
U arhanizacyi «HiejmMod» cikavaja historyja. Da krasavika 2022 hoda jurydyčnaja asoba nasiła inšuju nazvu — «JURANEKS-biaśpieka». Naŭrad ci kampanija z takoj nazvaj zajmałasia kampjutarnymi hulniami. U adnym sa starych biznes-katałohaŭ jaje śfiera dziejnaści apisvajecca jak «kansultavańnie pa pytańniach kamiercyjnaj dziejnaści i inšaje kansultavańnie pa pytańniach kiravańnia».
Skrynšot vypiski na TAA «HiejmMod» z ADR
Razam ź Dźmitryjem Pabiaržynym kampanijaj vałodali Alaksandr Ramanoŭski i «Kłub vialikaha tenisa».
Skrynšot vypiski na TAA «HiejmMod» z ADR
«Kibierpartyzany» razam z BRC raskazvali, što Alaksandr Ramanoŭski — heta były supracoŭnik Słužby biaśpieki Łukašenki. Jon byŭ saŭładalnikam (vierahodna, naminalnym) kampanij «Hłobałkastam-mieniedžmient» i «Hłobałkastam-komiers», jakija źviazvajuć ź Viktaram Šejmanam. Hetyja arhanizacyi stali zasnavalnikami «Hardservisa» — adzinaj achoŭnaj kampanii ŭ Biełarusi, jakaja maje prava vałodać ahniastrelnaj zbrojaj.
«Kłub vialikaha tenisa» ciapier nosić nazvu «Kłub vialikaha sportu». Pavodle ADR, adzin ź jaho ŭładalnikaŭ — były namieśnik dyrektara Fiederacyi chakieja na travie Alaksandr Čarnijčuk. Miarkujučy pa infarmacyi servisu kartoteka.by, spravy ŭ kłuba iduć nie vielmi: roznyja arhanizacyi sprabujuć ź jaho spahnać amal miljon rubloŭ.
Jašče adzin były ŭładalnik «HiejmMod» (užo paśla pierajmienavańnia) — baćka eks-pres-sakratara KDB Zbyšak Pabiaržyn. Da 2000 hoda jon byŭ deputatam spačatku Viarchoŭnaha Savieta, a potym Pałaty pradstaŭnikoŭ Nacyjanalnaha schodu. Taksama pracavaŭ namieśnikam hałoŭnaha lekara Kryčaŭskaj centralnaj rajonnaj balnicy.
Pra dziejnaść samoj GameMod viadoma nie tak šmat. Aficyjnaha sajta ŭ kampanii niama. U LinkedIn jana apisvajecca jak «mižnarodnaja studyja raspracoŭki AAA-hulniaŭ dla PC i kansolaŭ poŭnaha cykłu». U industryi «AAA-hulniami» nazyvajuć vysokabiudžetnyja biestselery — naprykład, Call of Duty abo The Last Of Us. «Lusterku» nie ŭdałosia znajści choć by jakoje dačynieńnie GameMod da jakoj-niebudź znakamitaj hulni.
U kampanii, miarkujučy pa LinkedIn, pracuje 82 čałavieki (ź ich 14 — u Polščy), jana źjaŭlajecca rezidentam PVT. Arhanizacyja davoli aktyŭna najmaje supracoŭnikaŭ. Za apošni miesiac jaje rekruciory šukali prahramistaŭ i mieniedžaraŭ hulniavych płatformaŭ.
Krynicy «Lusterka» z hulniavoj haliny raskazali, što «HiejmMod», chutčej za ŭsio, nie raspracoŭvaje ŭłasnyja hulni, a zajmajecca aŭtsorsam. Ale nad jakimi mienavita prajektami pracuje kampanija, nieviadoma.
Čytajcie taksama:
Aficery KDB, zamiašanyja ŭ homielskaj bojcy, bolš u viedamstvie nie pracujuć
«Pa bilinhu možna daviedacca ŭsio žyćcio čałavieka» — Łupanosaŭ
