Jak patrapić na zabłakavany internet‑sajt — instrukcyja dla «čajnikaŭ».
U krainie raspracoŭvajecca ŭkaz «Ab mierach pa ŭdaskanaleńni vykarystańnia nacyjanalnaha siehmienta hłabalnaj kampjutarnaj sietki internet». Jak adznačajuć jurysty, ź jaho dapamohaj stvorycca pravavaja baza dla błakavańnia niezaležnych sajtaŭ.
Što rabić, kali vy zaŭvažyli, što sajt «Našaj Nivy» nn.by čamuści nie pracuje, choć usie astatnija vieb‑staronki zahružajucca imhnienna?
Praz Novuju Hvinieju
Samy prosty sposab — vykarystańnie sajta‑ananimajziera ci proksi‑sierviera. Na staronku haziety treba budzie zachodzić nie naŭprost, a ŭ abchod. Kali «Biełtelekam» zabłakuje dostup na sajt dla naviednikaŭ ź Biełarusi, ananimajzier spačatku złučycca ź siervieram u Papua Novaj Hviniei ci Taici. Pakolki dla hviniejcaŭ dostup na sajt «NN» naŭrad ci budzie začynieny, vy trapicie na staronku haziety. Mahčyma, sajt budzie hruzicca daŭžej, čym zvyčajna, ale infarmacyja ŭsio ž budzie atrymanaja.
Dzie šukać ananimajziery? Dastatkova na lubym sajcie‑pošukaviku nabrać «vieb‑proksi» ci «vieb‑ananimajzier» — i źjaviacca dziasiatki varyjantaŭ. Naprykład, kproxy.com, hideme.ru, spysurfing.com. Pracavać ź imi lohka — na staroncy ŭ pustym poli nabrać nn.by i nacisnuć Enter na kłavijatury.
Kali niejki z ananimajzieraŭ nie pracuje — a zakryvajucca jany časta, — varta pašukać inšy.
I ja nie ja, i list nie moj
Z dapamohaj ananimajziera možna i zachavać svaju pryvatnaść. Nie sakret, što dla «prasunutych» chakieraŭ nieskładana vyznačyć, ź jakoha adrasa było adpraŭlena paviedamleńnie na forum ci elektronnuju poštu. Heta datyčycca jak internet‑adrasoŭ, tak i fizičnaha miescaznachodžańnia. U vypadku pracy praz ananimajzier, adziny, na kaho ŭdasca vyjści, — toj samy niaščasny hviniejski siervier.
Proksi‑sierviery padyduć i tym, chto choča aščadzić trafik — kolkaść zakačanaj infarmacyi. Jany mohuć pieradavać dadzienyja ŭ ścisnutym vyhladzie. «Raspakoŭka» ž budzie adbyvacca niepasredna na kampjutary.
