Urad zaćvierdziŭ metavyja pakazčyki prahnozu sacyjalna‑ekanamičnaha raźvićcia Biełarusi na 2010 hod.
Jak paviedamiła pres‑słužba ŭrada, adpaviednuju pastanovu № 1740 Saviet ministraŭ pryniaŭ 31 śniežnia 2009 hoda.
Zhodna z zaćvierdžanymi pakazčykami vałavy ŭnutrany pradukt (VUP) u 2010 hodzie ŭ supastaŭnych cenach da 2009 hoda zapłanavany na ŭzroŭni 111—113%.
Prahnoz vytvorčaści pradukcyi pramysłovaści — 110—112%, inviestycyj u asnoŭny kapitał — 123—125%.
Ekspart tavaraŭ u faktyčnych cenach prahnazujecca na ŭzroŭni 129—130%, impart — 119—120%, salda źniešniaha handlu tavarami — minus 6 młrd. 350 młn. dołaraŭ.
Uzrovień materyjałajomistaści pradukcyi ŭ pramysłovaści pavinien źnizicca na 0,7—1,2%. Źnižeńnie enierhajomistaści VUP prahnazujecca na 8—10%. Da ministerstvaŭ i kancernaŭ daviedzieny pakazčyk suadnosinaŭ tempaŭ rostu vyručki ad realizacyi pradukcyi, tavaraŭ (rabot, pasłuh) i tempaŭ rostu abjomaŭ vytvorčaści pramysłovaj pradukcyi. Taksama dla ich vyznačany pakazčyki ŭzroŭniu siertyfikavanaj pradukcyi, jakaja maje siertyfikat adpaviednaści, i novaj pradukcyi ŭ abjomie pramysłovaj vytvorčaści.
Ustanaŭlivajecca kantrol za vykanańniem metavych pakazčykaŭ prahnozu arhanizacyjami, jakija majuć asablivuju značnaść dla raźvićcia ekanomiki Biełarusi. U hety pieralik uklučana 130 arhanizacyj. U jaho ŭvajšli AAT «Homielškło», VRUP «Biełaruski cemientny zavod», ZAT «Atłant», AAT «Amkador», AAT «Minski matorny zavod», Minski zavod kołavych ciahačoŭ, AAT «Ahrakambinat «Dziaržynski», AAT «Babulina krynka», a taksama pradpryjemstvy kancernaŭ «Biełnaftachim», «Biellehpram», «Biełdziaržcharčpram», «Biełbijafarm», «Biellespapierapram».
Ministerstvu ekanomiki ŭ dvuchtydniovy termin paśla pryniaćcia hetaj pastanovy nieabchodna zaćvierdzić raźlikovyja bałansavyja pakazčyki prahnozu sacyjalna‑ekanamičnaha raźvićcia Biełarusi na 2010 hod. Hetamu ministerstvu sumiesna z respublikanskimi orhanami dziaržkiravańnia, abłvykankamami i Minskim harvykankamam nieabchodna ažyćciaŭlać pastajanny kantrol za vykanańniem najvažniejšych paramietraŭ prahnozu sacyjalna‑ekanamičnaha raźvićcia Biełarusi na 2010 hod.
U pastanovie ŭkazana, što asnoŭnyja metavyja pakazčyki raźvićcia nie vyznačajucca dla haspadarčaha tavarystva, jakoje nie karystajecca dziaržaŭnaj finansavaj padtrymkaj i (abo) u jakim Biełaruś abo administracyjna‑terytaryjalnaja adzinka, vałodajučy akcyjami (dolami ŭ statutnych fondach), nie moža vyznačać rašeńni, što prymajucca hetym haspadarčym tavarystvam.
