Na razhlad abiedźviuch pałat Kanhresa ZŠA pastupiŭ zakonaprajekt «Akt ab uliku biełaruskich pastavak zbroi».
Jak paviedamlaje aficyjny sajt kanhresa, zakonaprajekt pradpisvaje Dziarždepartamientu ZŠA štohod davać parłamientaryjam spravazdačy ab biełaruskich pastaŭkach zbroi. Hetyja spravazdačy pavinny ŭtrymlivać infarmacyju pra «abjomy i miechanizmy ekspartu ŭzbrajeńniaŭ i spadarožnych pasłuh uradam Biełarusi i biełaruskimi pradpryjemstvami, uklučajučy dachody ad takich ździełak i patencyjalnuju rolu ŭrada i pradpryjemstvaŭ Rasii ŭ hetym eksparcie».
Dziarždepartamient taksama pavinien aceńvać stan zbrojevych składoŭ, što zastalisia ŭ Biełarusi z časoŭ SSSR, i mahčymaści biełaruskich pradpryjemstvaŭ u vytvorčaści zbroi dla ekspartu.
Aprača taho, u spravazdačach Dziarždepartamienta pavinna ŭtrymlivacca infarmacyja ab pastaŭkach Biełaruśsiu zbroi ŭ «lubuju krainu, jakaja aceńvajecca jak dziaržava, što padtrymlivaje teraryzm abo admaŭlajecca ad supracoŭnictva z ZŠA ŭ kontrterarystyčnych apieracyjach, uklučajučy Vieniesuełu».
Jak zaznačajecca ŭ zakonaprajekcie, ekspart zbroi Biełaruśsiu za pieryjad z 1999 pa 2006 hady aficyjna aceńvajecca ŭ adzin miljard dołaraŭ. Takim čynam, Biełaruś źjaŭlajecca adzinaccataj u śviecie krainaj pa abjomie ekspartu zbroi. Pry hetym u dakumiencie padkreślivajecca: «Realny abjom pastavak biełaruskaj zbroi moža značna pieraŭzychodzić aficyjny, tamu što apublikavanyja dahavory ab handli zbrojaj mohuć nie ŭklučać sakretnyja pahadnieńni, zaklučanyja pradstaŭnikami biełaruskaha ŭrada abo pradpryjemstvami, što naležać dziaržavie».
Jak vynikaje z Akta ab uliku biełaruskich pastavak zbroi,
«Biełaruś źjaŭlajecca bujnym pastaŭščykom rakiet, minamiotaŭ, supraćtankavaha ŭzbrajeńnia i min paleścinskim ekstremisckim hrupoŭkam i dziaržavam‑sponsaram teraryzmu, takim jak Iran i Siryja,
a taksama viertalotaŭ Mi‑24, artyleryjskich sistem i braniatechniki rasijskaj vytvorčaści ŭradu Sudana, tankaŭ kamunistyčnamu režymu ŭ Paŭnočnaj Karei, vajennych samalotaŭ i avijacyjnych ruchavikoŭ u Iran».
Aprača taho, zaznačajecca ŭ zakonaprajekcie, pavodle źviestak upłyvovaha brytanskaha vajennaha časopisa Janes Air‑Launched Weapons, «prodaž rasijskich kompleksaŭ S‑300 u Iran adbyvajecca praź Biełaruś». «Biełaruś užo nabyła šmatlikija sistemy S‑300 u Rasii pa canie, jakaja značna nižejšaja za realnuju», — śćviardžajecca ŭ dakumiencie.
U Ministerstvie zamiežnych spraŭ i Dziaržaŭnym vajenna‑pramysłovym kamitecie Biełarusi hetuju infarmacyju pakul nie kamientujuć.
