Vital Čybisaŭ. Fota ź jahonaj staronki Ukantakcie
Zahinułaha kličuć Vital Čybisaŭ. Na momant śmierci jamu było 22 hady. Rodam chłopiec z Klecka, paśla siamja pierajechała ŭ Mahiloŭ, a zatym u Dziaržynsk.
Jon ros u prostaj siamji — zhodna z bazami «Kibierpartyzanaŭ», maci pracavała hładzilščycaj u miascovaj balnicy, a baćka tokaram. Baćka chłopca, imavierna, vypivaŭ i ŭžo pamior.
Imavierna, adnosiny ŭ siamji byli niaprostyja — Vital, jaho brat i jaho maci za ŭvieś čas nie vykłali nivodnaha fota razam z baćkam chłopcaŭ. A ŭ sacsietkach jany karystalisia dziavočym proźviščam maci — Sokał.
Vital Čybisaŭ u padletkavym uzroście. Fota ź jahonaj staronki Ukantakcie
Žyli Čybisavy niebahata — siamjoj tulilisia ŭ internacie ŭ Maładziečnie.
U dziacinstvie Vital byŭ chulihanam. Zhodna z bazami «Kibierpartyzanaŭ», va ŭzroście 11 hadoŭ jon skraŭ čužy smartfon, a ŭ 13 — dva rovary i jašče adzin smartfon prosta na pracy ŭ jahonaj maci. Za heta baćkoŭ štoraz štrafavali, a jaho samoha musili pastavić na ŭlik u milicyju.
Vital paśla škoły skončyŭ Uździenski dziaržaŭny kaledž, jaki tady byŭ prafiesijnym licejem. Viadoma, što jon uchilaŭsia ad słužby ŭ vojsku i jamu navat zakryli za heta vyjezd ź Biełarusi ŭ 2020-m. Ale słužyć usio ž daviałosia, i ŭ vasieńni pryzyŭ 2021-ha jaho zabrali ŭ armiju.
Vital Čybisaŭ u armii pobač z maci. Fota ź jahonaj staronki Ukantakcie
Praz paŭtara hady słužby jon prabyŭ na «hramadziancy» ŭsiaho niekalki miesiacaŭ. Užo ŭ lipieni 2023-ha Čybisaŭ zavierbavaŭsia na kantrakt u rasijskuju armiju, kab vajavać suprać ukraincaŭ. Byŭ na pieradavoj.
Data jahonaj śmierci nieviadomaja, ale heta adbyłosia pamiž 26-m i 28-m listapada 2023-ha — jašče 25-ha jon byŭ aktyŭny Ukantakcie, a 24-ha vykłaŭ badzioraje videa, dzie jon kiruje mašynaj u vajskovaj formie. Abstaviny hibieli Čybisava taksama nieviadomyja.
Vital Čybisaŭ i jašče adzin najmit, Siarhiej Nakipaŭ. Apošni rodam z horada Krasnadon, z krasavika 2014-ha akupavanaha vojskami Rasii. Pa źviestkach ź jahonaj archiŭnaj staronki Ukantakcie, raniej jon jeździŭ na zarobki ŭ Rasiju i Biełaruś.
Pachavali Vitala ŭ rodnym Maładziečnie.
Mahiła Vitala Čybisava ŭ Maładziečnie. Fota z sacsietak
Pra śmierć najmita stała viadoma tolki praz paŭhoda paśla jaje.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Pad Bachmutam zahinuŭ vahnieraviec ź Biełarusi
Byłyja siłaviki i kryminalniki. Što za biełarusy vajujuć va Ukrainie na baku Rasii
