Ivan i Natalla Ejsmanty. Skrynšot ź videa «Biełaruś 1»
U mai 2018 hoda Natalla Ejsmant nabyła kvateru ŭ Minsku — u domie № 32 na vulicy Ratamskaj. Tady razam z žyllom byli nabytyja dva parkovačnyja miescy. U rehistracyjnych dakumientach hetaja nieruchomaść paznačanaja jak adnapakajovaja, choć płošča jaje davoli vialikaja — 108,4 kv. m. Tam prapisanyja jak Natalla, tak i Ivan Ejmanty.
Dom №32 na vulicy Ratamskaj u Minsku. Fota: Jandeks.Karty
Hety dom uvachodzić u žyły kompleks «Alimpik Park», što pobač z vadaschoviščam Drazdy i zakaźnikam «Lebiadziny». Terytoryja kompleksu abharodžanaja i znachodzicca pad videanazirańniem, tam jość ułasnaja infrastruktura: azdaraŭlenčy kompleks z basiejnam, saunami, trenažornaj załaj i restaranam.
Žyllo tam kaštuje davoli doraha. Naprykład, u tym ža domie №32 ciapier pradajecca kvatera mienšaja, čym u Ejsmantaŭ — 63,1 kv. m, jana kaštuje 794 315 rubloŭ, ci 245 000 dalaraŭ. Jość jašče adna kvatera ŭ hetym domie, takoha ž mietražu, ale z ramontam praściejšym, jaje pradajuć za 462 810 rubloŭ, ci 142 750 dalaraŭ. Samaja darahaja kvatera ŭ «Alimpik parku» pradajecca za 1 604 840 rubloŭ, ci 495 000 dalaraŭ — čatyrochpakajovaja, płoščaj 124,2 kv. m.
Dom №16 na vulicy Kamiennahorskaj. Fota: realt.by
U 2019 hodzie Natalla Ejsmant kupiła jašče adnu kvateru ahulnaj płoščaj 118,4 kv. m. Žyllo znachodzicca ŭ domie № 16 na vulicy Kamiennahorskaj, heta panelnaja dzieviacipaviarchoŭka, pabudavanaja ŭ 2010 hodzie. Pa stanie na siaredzinu 2021 hoda infarmacyi pra zarehistravanych u kvatery ludziej nie było.
Ciapier u hetym domie pradajecca žyllo. Praŭda, niama abjektaŭ z takoj vialikaj płoščaj, jak u Ejsmant. Samyja vialikija kvatery — heta trochpakajoŭki na 75-76 «kvadrataŭ», košt ich pačynajecca ad 290 000 rubloŭ (kala 90 000 dalaraŭ) i dachodzić da 325 000 rubloŭ (krychu mienš za 100 000 dalaraŭ).
Taksama muž i žonka Ejsmanty majuć dva ŭčastki ŭ sadovym tavarystvie «Telesad», heta pobač ź vioskaj Krasny Bor Łahojskaha rajona. Da MKAD adsiul — kala 50 km, da harnałyžnaha centra «Łahojsk» — kala 20 km.
Za Natallaj ličycca ŭčastak pad №115, za Ivanam — №108, płošča kožnaha składaje dzieviać sotak. Darečy, raźmieščany pobač učastak №109 na siaredzinu 2021 hoda byŭ zarehistravany na siastru Ivana — Hannu Ejsmant, jakaja taksama pracuje na dziaržaŭnym telebačańni.
Sadovaje tavarystva «Telesad», dzie jość nieruchomaść u Natalli i Ivana Ejsmantaŭ. Skrynšot z Google Maps
Što tyčycca aŭto, to za Natallaj ličyŭsia krasovier BMW X1 2013 hoda vypusku. Kali prykinuć košt madeli, uličvajučy tolki datu jaje vypusku, to taki transpart ciapier možna kupić prykładna ad 42 000 rubloŭ (kala 13 000 dalaraŭ) da 53 000 rubloŭ (kala 16 500 dalaraŭ). Na Ivanie ž visić Citroen 2004 hoda vypusku.
Čytajcie taksama:
Jakaja majomaść jość u Kosinca? Dom u Drazdach, kvatera na Hvardziejskaj… I čatyry stvały
Stała viadoma, jakimi aŭtamabilami vałodajuć Kačanava i siemji jaje dźviuch dačok
