U Krymie paśla praciahłaha znachodžańnia ŭ simferopalskim śledčym izalatary vyzvalili 29‑hadovaha moładzievaha aktyvista i rok‑muzyku Ihara Koktyša, jakoha abvinavačvali ŭ Biełarusi ŭ ciažkim kryminalnym złačynstvie. Koktyš bolš za dva z pałovaj hady ŭ źniavoleńni čakaŭ ekstradycyi ŭ Biełaruś.
Jaho advakatam udałosia pierakanać Eŭrapiejski sud pa pravach čałavieka ŭ palityčnaj padstavie abvinavačvańniaŭ i ŭ niepravamiernych dziejańniach ukrainskaj ułady.
Uviečary 2 lutaha Ihar Koktyš vyjšaŭ na svabodu i razam z žonkaj Irynaj, što jaho sustrakała la ścienaŭ SIZA, ciahnikom vyjechaŭ u stalicu Ŭkrainy. Jon maje namier viarnucca ŭ Žłobin, dzie žyvie jaho siamja. Va Ŭkrainu jon pryjechaŭ u 2002 hodzie, ratujučysia ad pieraśledu biełaruskich uładaŭ, tut ažaniŭsia i stvaryŭ svoj rok‑hurt. Ale ŭletku 2007 hodu, kali jon z žonkaj byŭ na adpačynku ŭ Sievastopali, jaho źmiaścili ŭ simferopalski SIZA. Tam Koktyš znachodziŭsia 2 hady i 7 miesiacaŭ.
Biełaruś patrabavała jaho vydačy, abvinavačvajučy ŭ zabojstvie. Sam Ihar Koktyš takija abvinavačvańni abviarhaŭ i śćviardžaŭ,
što heta — pomsta ŭładaŭ za jaho aktyŭnuju padtrymku apazycyjnaha kandydata ŭ prezydenty Alaksandra Milinkieviča, jaki tady balatavaŭsia na pasadu kiraŭnika biełaruskaj dziaržavy.
Ihar Koktyš byŭ vyzvaleny pavodle rašeńnia Hienprakuratury Ŭkrainy i na patrabavańnie Eŭrapiejskaha sudu pa pravach čałavieka. U svaim rašeńni ad 10 śniežnia 2009 hodu Eŭrapiejski sud źviarnuŭ uvahu na parušeńnie dziaržavaj Ukraina ŭ dačynieńni da Ihara Koktyša adrazu niekalkich artykułaŭ Eŭrapiejskaj kanvencyi pa pravach čałavieka, abaviazaŭšy krainu taksama vypłacić jamu 7 tysiač eŭra kampensacyi.
Razam z tym Ihar Koktyš zajaviŭ, što vykanańnie Ŭkrainaj patrabavańnia Eŭrapiejskaha suda choć z amal dvuchmiesiacovaj zatrymkaj, śviedčyć, što heta ŭsio ž jość demakratyja i za jaje varta zmahacca: «Ja pierakanaŭsia: spraviadlivaść jość, jaje možna dasiahnuć. Ale adzinaja prablema ŭ tym, što jaje ciažka damahacca. U maim ža vypadku ja prasiedzieŭ bolš za dva z pałovaj hady, tamu što prosta nie było zakonu ab ekstradycyi. Heta elementarnyja rečy, jakija nie vyrašyć. Heta prablema «.
Pa słovach Ihara Koktyša, ciapier jon choča adpačyć i palačycca. Kaža, što ni na kaho nie trymaje zła.
Ale, usio ž sudzicca jon maje namier i dalej — za prava žyć va Ŭkrainie.Sud pa jaho pazovu pry pryznańni za im statusu palityčnaha biežanca pavinien adbycca ŭ Simferopali 12 lutaha.