10 lutaha skončyłasia mižnarodnaja kanfierencyja «Šlach Biełarusi ŭ Jeŭropie». Zaklučnaj jaje častkaj stała abmierkavańnie roli prahramy «Uschodniaje partniorstva» dla Biełarusi.
Udzieł u dyskusii pryniali Uładzisłaŭ Vialička – ctaršynia Mižnarodnaha kansorcyumu «JeŭraBiełaruś», Volha Stužynskaja – pradstaŭnica arhanizacyi «Ofis za demakratyčnuju Biełaruś», Rałan Fredzienštajn z Centra jeŭrapiejskich daśledavańniaŭ, Alaksandr Strałkoŭ – pradstaŭnik Instytutu Jeŭropy Rasijskaj akademii navuk, i Jeŭhienijuš Smolar z varšaŭskaha Centra mižnarodnych adnosinaŭ.
Na kanfierencyi byli akreślenyja čakańni i pierśpiektyvy ŭdziełu Biełarusi va «Uschodnim partniorstvie» ŭ takich halinach jak ekanamičnaje supracoŭnictva, adnosiny ŭ śfiery enierhietyki, palityčnaje i sacyjalnaje raźvićcio. Jak zaznačyła Volha Stužynskaja --
«UP – heta sufle, jakoje zanadta rana dastali ź piečy. Adnak udzieł u prahramie dla Biełarusi maje pazityŭnyja vyniki.»V.Stužynskaja taksama zaŭvažyła, što UP dazvoliła našaj krainie častkova pazbavicca kliše «apošniaj dyktatury ŭ Jeŭropie» i palehčyła praceduru atrymańnia jeŭrapiejskich kredytaŭ.
Alaksandr Strałkoŭ ź Instytuta Jeŭropy RAN raspavioŭ ab adnosinach Rasii da prahramy UP.
«Rasija admoŭna adniesłasia da źjaŭleńnia UP. Byli navat pažadańni, kab Jeŭropa kansultavałasia z Rasijaj u spravach prahramy «Uschodniaje partniorstva». Adnoj dumki ŭ Rasii, naturalna, niama, adnak pieravažajuć niehatyŭnyja traktoŭki».
Jeŭhienijuš Smolar skancentravaŭsia ŭ svaim vystupie na rehijanalnaj palitycy. «Heta pamyłka, što Biełaruś i Polšča nie majuć ciesnych adnosinaŭ. Nam jany patrebnyja» – adznačyŭ palitołah.
Kanfierencyja pryciahnuła ŭvahu nie tolki apazicyi i niezaležnych hramadskich kołaŭ. Na joj prysutničali dziaržaŭnyja čynoŭniki i pradstaŭniki viadučych VNU krainy. Vidavočna, što cikavaść da jeŭrapiejskaha šlachu Biełarusi pastupova pračynajecca i ŭ aficyjnych kołach.
