Zavočnaja «pierastrełka» pamiž dvuma vydatnymi «bajcami ideałahičnaha frontu» atrymała praciah. Zajavy, zroblenyja pieršym namieśnikam kiraŭnika prezidenckaj administracyi Natallaj Piatkievič u Kobrynie, možna ličyć adkazam staršyni Nacyjanalnaj teleradyjokampanii Alaksandru Zimoŭskamu.
Nahadajem, što na hetym tydni kiraŭnik NDTRK apublikavaŭ artykuł, u jakim śćviardžaŭ, što «kampanija pa vybarach Prezidenta Respubliki Biełaruś A. R. Łukašenki razhortvajecca à propos, pry poŭnaj adsutnaści aficyjnaj ideałohii». Taksama Zimoŭski prajšoŭsia pa stanie spravaŭ u śfiery dziaržprapahandy, za jakuju adkazvaje Piatkievič.
Publičnaja krytyka ŭ adras asoby, jakaja zajmaje ŭ biełaruskaj uładnaj ijerarchii takoje značnaje miesca, nie mahła prajści niezaŭvažna. Tyja, chto źviarnuŭ uvahu na artykuł Zimoŭskaha, čakali, čym adkaža Piatkievič. I jana, pa sutnaści, adchiliła pretenzii ŭ svoj adras, zajaviŭšy, što niekali pastaŭlenaja zadača adradzić na najvyšejšym uzroŭni ideałahičnuju pracu ŭ Biełarusi napoŭnicu realizujecca.
– Siońnia my ŭžo možam skazać, što ideałahičnaja viertykal u našaj krainie jość, i my ŭžo havorym nie pra stanaŭleńnie, a pra ŭdaskanaleńnie jaje pracy, – skazała Natalla Piatkievič žurnalistam u kułuarach rehijanalnaj kanfierencyi ideałahičnych rabotnikaŭ Bresckaj vobłaści, jakaja prachodziła 4 sakavika ŭ Kobrynie .
Asablivym dasiahnieńniem pieršy namieśnik kiraŭnika administracyi ličyć źjaŭleńnie ideołahaŭ nie tolki ŭ dziaržaŭnaj śfiery, ale i ŭ pryvatnym biznesie.
– Pryjemna adznačyć, što na pryvatnych pradpryjemstvach ažyćciaŭlajecca ideałahičnaja praca, i heta nie cisk źvierchu, a sapraŭdy patreba. Heta vielmi važna, bo zadača ideałahičnaj pracy – naładžvać niepasredny kantakt pamiž prostym čałaviekam i ŭładaj, spryjać vyjaŭleńniu zapatrabavańniaŭ i prablemaŭ ludziej i dapamahać ich vyrašeńniu. Heta hałoŭnaja zadača, biez vyrašeńnia jakoj nie moža isnavać dziaržava, i heta hałoŭnaje pryznačeńnie ideołaha, – ličyć Natalla Piatkievič.
Zrešty, było b davoli dziŭna, kali b vysokapastaŭlenaja čynoŭnica zaniałasia samakatavańniem i pryznała «poŭnuju adsutnaść aficyjnaj ideałohii». U situacyi, jakaja skłałasia, Piatkievič abrała adzina mahčymuju taktyku: śćviardžać, što ŭ daručanaj joj halinie pośpiechi značna bolš prykmietnyja za niedachopy, a apošnija buduć vyniščacca šlacham «udaskanaleńnia pracy». Adnak taja akaličnaść, što dziejnaść pieršaha namieśnika kiraŭnika prezidenckaj administracyi stała pradmietam źjedlivaj krytyki z boku «kalehi pa ideałahičnym froncie», užo samo pa sabie škodzić tryvałaści jaje pazicyj.
