Hruzija zapanikavała paśla taho, jak subotnim viečaram u efiry telekanała «Imiedzi» byŭ pakazany paŭhadzinny repartaž pra novaje rasijskaje ŭvarvańnie ŭ krainu, hibiel prezidenta Michaiła Saakašvili i zdradu hruzinskaj apazicyi. Pra toje, što heta insceniroŭka, havaryłasia tolki adnoj frazaj u pačatku i kancy pieradačy.
U minułuju subotu hledačy hruzinskaha telekanała «Imiedi» zamiest tradycyjnaj infarmacyjnaj pieradačy «Chronika» ŭ vosiem hadzin viečara ŭbačyli «śpiecyjalny vypusk». Tyja, chto hladzieŭ pieradaču nie spačatku, źviedali šok: razmova ŭ vypusku išła ab novaj vajnie z Rasijaj, hetym razam jašče bolš niaŭdałaj dla hruzinskaj armii.
Viadučy infarmacyjnaha vypusku z poŭnaj surjoznaściu śćviardžaŭ, što «siońnia, 7 červienia», paśla teraktu suprać paŭdniovaasiacinskaha prezidenta Eduarda Kakojty, Rasija znoŭ uvarvałasia na terytoryju Hruzii, prezident Saakašvili zahinuŭ pry sprobie evakuacyi, a ŭładu ŭ krainie zachapili eks‑śpikier hruzinskaha parłamenta Nino Burdžanadze i apazicyjanier Zurab Nahaideli.
Pra toje, što heta nie sapraŭdnyja naviny, a mistyfikacyja, zaklikanaja pradkazać budučyniu, hledačoŭ papiaredžvali tolki adnoj frazaj — u pačatku i ŭ kancy paŭhadzinnaha efiru. Uvieś astatni čas «Imiedzi» raskazvaŭ pra toje, jak u Tbilisi ŭvachodziać rasijskija tanki i dzie hruzinskija vajskoŭcy prymajuć boj.
Pa zakančeńni pieradačy ŭ efir telekanała viarnułasia viadučaja Nacija Kabierydze, zaprasiŭšy haściej studyi, siarod jakich byli palitołahi i hramadskija dziejačy, da abmierkavańnia, ci vierahodny taki scenar ŭ budučyni.
U hety samy čas z Poci i Hory, jakija ŭ žniŭni 2008 hodu ŭžo bambiła rasijskaja avijacyja, stali pastupać paviedamleńni, što miascovaje nasielnictva ŭ panicy pačało pakidać horad. Na bienzazapraŭkach stajali kałony mašyn, u praduktovych kramach utvarylisia čerhi. Pa dadzienych Tbiliskaj słužby chutkaj dapamohi, kolkaść vyklikaŭ padvoiłasia, i lekaram daviałosia pracavać amal u nadzvyčajnym režymie.
Pryjšoŭšy ŭ siabie, aburanyja žychary stalicy stali źbiracca la budynka telekanała, patrabujučy vybačeńniaŭ ad načalstva. Siudy ž pryjechali i niekatoryja lidery apazicyi, u tym liku Burdžanadze. «Imiedzi» adreahavaŭ, kali abmierkavańnie pieradačy jašče išło, puściŭšy biahučy radok z vybačeńniami pierad svaimi hledačami. Adnak uśled haściam, što vychodzili sa studyi, lacieli abrazy. Burdžanadze paabiacała, što nie paźniej čym u paniadziełak padaść u sud na «Imiedzi».
Prezident Saakašvili, jakoha nie było napiaredadni ŭ stalicy, abviaściŭ, što pieradača pra ŭjaŭnuju vajnu z Rasijaj była dla jaho vielmi niepryjemnaj, i kali telekanał chacieŭ abmierkavać vierahodnaść novaha rasijskaha ŭvarvańnia, to moh zrabić heta i pa‑inšamu.
Saakašvili dadaŭ, što vypusk «Chroniki» byŭ maksimalna blizki da mahčymaha raźvićcia padziej.
«Heta nasamreč byŭ vielmi niepryjemny film, ale najniepryjemniejšym jość toje, što hety repartaž byŭ maksimalna blizki da taho, što moža adbycca ci zadumana voraham Hruzii. Pakaz nasamreč drennaha filma pačaŭsia letam 2008 hoda. Jany vyrašyli nam pakazać, jak razburajecca Hruzija, i dumali, što hruzinski narod apyniecca ŭ roli pasłuchmianaha hledača i spakojna prymie ŭsio heta, ale ŭ ich heta nie atrymałasia, i hruzinski narod pierapyniŭ pakaz hetaha filma», — zajaviŭ jon.
Saakašvili taksama zaŭvažyŭ, što namioki na toje, što častka ŭzbrojenych siłaŭ Hruzii moža admovicca padparadkoŭvacca zahadam hałoŭnakamandujučaha ŭ vypadku novaj vajny, niedarečnyja. Hulać z hetaj temaj nielha, zajaviŭ prezident. «Pra mianie niachaj havorać usio, što chočuć, ale z vojskam treba być aściarožnymi, tamu što heta toje, na čym staić hruzinskaja dziaržava», — dadaŭ jon.
Hiendyrektar telekanała Hieorhij Arvieładze śpiecyjalna padkreśliŭ, što aŭtary pieradačy nie stavili sabie metaj zapałochać hruzinskaje hramadstva. Pieradača «była šokavaj dla hramadstva, my heta ŭśviedamlajem i vybačajemsia, — zajaviŭ jon. — Atrymany vynik akazaŭsia ciažkim z etyčnaha punktu hledžańnia. Ale heta nie ŭvachodziła ŭ płan abo zadačy hetaj pieradačy. Hałoŭny pryncyp byŭ u tym, kab hramadstva było papiaredžanaje, i ŭ pačatku pieradačy tak i było zroblena. Ja biaru na siabie adkaznaść za toje, što adbyłosia, i nie źbirajusia ni na koha pakazvać palcam», — skazaŭ Arvieładzie.
U paniadziełak Nacyjanalnaja kamisija pa telekamunikacyjach pavinnaja sabracca na nadzvyčajnaje pasiedžańnie, na jakim buduć acenienyja dziejańni «Imiedzi». «Nacyjanalnaja kamunikacyjnaja kamisija ŭličvaje i pavažaje pryncyp redakcyjnaj niezaležnaści kožnaha viaščalnika, ale adnačasova kateharyčna patrabuje ad usich viaščalnych kampanij niaŭchilna vykonvać «Kodeks pavodzinaŭ viaščalnikaŭ»«, — havorycca ŭ zajavie kamisii, apublikavanaj na jaje aficyjnym sajcie.
U im taksama adznačajecca, što prahrama «Śpiecyjalny repartaž», jakaja vyjšła ŭ efiry telekampanii «Imiedzi», častkaj jakoj stała «Chronika», hety kodeks parušyła. «Značnaja častka hledačoŭ była ŭviedzienaja ŭ zman. Pavodle acenki staršyni i čalcoŭ Nacyjanalnaj kamunikacyjnaj kamisii, heta było pamyłkaj i biezadkaznym staŭleńniem telekampanii ŭ dačynieńni da patrabavańniaŭ «Kodeksa pavodzinaŭ viaščalnikaŭ», — śćviardžajuć u kamisii.
