Siaredniehadavaja cana na haz dla Biełarusi ŭ 2010 hodzie składzie 171,5 dalara. Pra heta paviedamiŭ žurnalistam u Minsku 26 sakavika namieśnik staršyni praŭleńnia AAT «Hazprom» Andrej Kruhłoŭ.
«Zychodziačy z papiarednich damoŭlenaściej, pry raźliku cany na haz prymianiajecca panižalny kaeficyjent 0,9. Heta značyć, što siaredniehadavaja cana na haz dla Biełarusi budzie składać 171,5 dalara, — skazaŭ jon. — My raźličvajem, što zychodziačy z hetaj cany buduć ažyćciaŭlacca płaciažy».
Dla paraŭnańnia: u 2009 hodzie siaredniehadavaja cana na haz składała 148—150 dalaraŭ za tysiaču kubamietraŭ.1
Takija źviestki pryvioŭ u śniežni minułaha hoda hienieralny dyrektar AAT «Biełtranshaz» Uładzimir Majoraŭ.
Kruhłoŭ paviedamiŭ, što zapazyčanaść Biełarusi za haz na siońnia składaje 94 młn. 500 tys. dalaraŭ. Heta zapazyčanaść, što ŭtvaryłasia ŭ 2010 hodzie. Prablemy z raźlikami, pavodle jaho słoŭ, uźnikli ŭ druhoj pałovie 2009 hoda, ale da kanca śniežnia letašniaja zapazyčanaść była pahašana.
Pradstaŭnik «Hazproma» taksama adznačyŭ, što pytańnie raźliku rasijskimi rublami za rasijski haz, jaki pastaŭlajecca ŭ Biełaruś, «nie źniata z paradku dnia». Pavodle słoŭ Kruhłova, heta b źniziła valutnyja ryzyki i Biełarusi, i Rasii. «Pytańnie ŭ tym, što ciapier naftavy košyk, da jakoha pryviazana cana na haz, fiksujecca ŭ dalarach», — rastłumačyŭ Kruhłoŭ.
Zakranajučy karparatyŭnuju palityku kampanii, jon padkreśliŭ, što «Hazprom» zacikaŭleny ŭ atrymańni kantrolnaha pakieta akcyj AAT «Biełtranshaz». Razam z tym, adznačyŭ Kruhłoŭ, hetaje pytańnie »lažyć nie tolki ŭ płoskaści ŭzajemadziejańnia subjektaŭ haspadarańnia, ale i miždziaržaŭnych pahadnieńniaŭ».
Kruhłoŭ padkreśliŭ, što asnoŭnyja akcyjaniery «Hazproma» i «Biełtranshaza» — dziaržavy. »Tamu my budziem karektavać svaje inviestycyjnyja płany, zychodziačy ź mižuradavych i dziaržaŭnych damoŭlenaściej», — skazaŭ namieśnik staršyni «Hazproma».
