Vybuchi ŭ maskoŭskim mietrapalitenie adrazu vyklikali ŭ pamiaci sieryju vybuchaŭ u Rasii ŭ vieraśni 1999 hodu. Tady ŭ vyniku padryvu žyłych damoŭ u Bujnaksku, Maskvie i Vałhadonsku zahinuli bolš za 300 čałaviek.
Pavodle aficyjnaj viersii, mižnarodnyja terarysty Emir al‑ Chatab i Abu‑Umar, jakija dziejničali ŭ Čačni, vykarystali dla arhanizacyi teraktaŭ hrupu karačajeŭcaŭ na čale z Hačyjajevym. Piać hadoŭ tamu členy hetaj hrupy Dziekušaŭ i Krymšamchałaŭ byli pryznanyja vinavatymi i asudžany ŭ Maskvie. (Jany adbyvajuć pažyćciovaje pakarańnie, Hačyjajeŭ znachodzicca ŭ fiederalnym vyšuku.)
Jość i šmat nieaficyjnych viersij. Pavodle adnoj ź ich, da tych teraktaŭ spryčynilisia rasijskija śpiecsłužby. Paviedamlałasia, naprykład, što ŭ padvale doma ŭ Razani znajšli miech z hieksahienam (hetaje rečyva vykarystoŭvałasia ŭ papiarednich vybuchach). Miascovaje adździaleńnie FSB zajaviła, što heta byli ŭsiaho tolki vučeńni, i što ŭ miachu byŭ cukar.
U 2001 hodzie na Zachadzie vyjšła kniha «FSB uzryvaje Rasiju». Adnym ź jaje suaŭtaraŭ byŭ Alaksandr Litvinienka, paźniej atručany ŭ Łondanie radyjeaktyŭnym cezijem.
U kožnym vypadku, terakty 99‑ha pasłužyli dadatkovym apraŭdańniem dla Kramla u raźviazańni druhoj Čačenskaj vajny. A rejtynh Uładzimira Pucina, jaki ŭ žniŭni ŭznačaliŭ rasijski ŭrad (pierad hetym jon byŭ kiraŭnikom FSB) vyras da niabiosaŭ, i ŭ sakaviku 2000‑ha jon biez prablem pieramoh na prezidenckich vybarach. Pačałasia pucinskaja epocha.
Niahledziačy na abiacańnie Pucina mačyć terarystaŭ u sartyry, jakoje jon daŭ na samym pačatku svajho prezidenctva, terakty ŭ Rasii za apošnija dziesiać hadoŭ adbyvalisia nie adnojčy, u tym liku ŭ Maskvie. Praŭda, u ich jość adna asablivaść: adrozna ad teraktaŭ Al‑Kajdy i inšych terarystyčnych arhanizacyj za miažoj, u Rasiei nichto nie biare na siabie publičnuju akdaznaść za ich. Nichto pakul nie ŭziaŭ na siabie adkaznaść i za vybuchi ŭ maskoŭskaj padziemcy.
Jak by to ni było, hetyja terakty — vyklik ciapierašniamu prezidentu Miadźviedzievu. Baraćba za ŭładu, jakaja ŭvieś čas adbyvajecca pamiž roznymi hrupoŭkami pad koŭdraj, apošnim časam stała jaŭnaj navat dla ludziej, dalokich ad palityki. Dajšło da taho, što prezident publična zajaviŭ ab nievykanańni čyoŭnikami niekatorych jaho ŭkazaŭ i rasparadžeńniaŭ i papiaredziŭ ich ab adkaznaści. A tut jašče zakliki da madernizacyi, sproba refarmavać siłavuju strukturu — MUS i h.d. Palityka Miadzieviedzieva, niesumnienna, vyklikaje vialikuju niezadavolenaść prynamsi častki atačeńnia Pucina. Jany chacieli b peŭnych harantyj dla jaho pieramohi na prezidenckich vybarach 2012 hodu.
Jak paŭpłyvajuć maskoŭskija vybuchi na ŭnutranuju i zamiežnuju palityku Rasii — pabačym bližejšym časam.
Što tyčycca ŭładaŭ Biełarusi, dyk terakty dazvalajuć im, jak byccam, vykarystać situacyju ŭ vuzka‑ prapahandysckich metach: hladzicie, maŭlaŭ, jak usio dobra i stabilna ŭ nas, i jak kiepska ŭ našych siabroŭ‑spabornikaŭ u Rasii.
Niejak pa‑novamu, darečy, hučać paśla teraktaŭ u Maskvie słovy kiraŭnika minskaj milicyi Farmahieja, jakija jon pramoviŭ pierad mitynham apazicyi 25 sakavika. Jon kazaŭ, byccam niejkija ekstremisckija elemienty z Rasii rychtujuć pravakacyju nakštałt toj, što adbyłasia ŭ stalicy Biełarusi 3 lipienia…
Zrazumieła, heta ŭsiaho tolki supadzieńnie. Dy j nielha paraŭnać vybuch pakieta z‑pad soku, u vyniku čaho byli paranieny niekalki čałaviek, z padryvami na stancyjach mietro, achviarami jakich stali dziasiatki ludziej. A voś chto atrymaŭ vyhadu ŭ abodvuch vypadkach — inšaja sprava.
Padziei ŭ Maskvie sami pa sabie trahiedyja. Ale jašče bolš surjoznymi ŭžo ciapier padajucca nastupstvy hetych padziej, u tym liku, u pierśpiektyvie, i dla adnosinaŭ Biełarusi z Rasijaj.
