Biełarusy Taronta na Dzień Voli zładzili suśvietny skajp-telemost dasłała čytačka; dadalisia foty 7

U niadzielu 28 sakavika kala piacidziesiaci čałaviek sabralisia ŭ Biełaruskim hramadzka-relihijnym centry Taronta, kab adśviatkavać Dzień Voli. Padčas imprezy — druhi raz za ŭsiu historyju biełaruskaj prysutnaści ŭ Kanadzie — adbyŭsia mižkrainavy «skajp-telemost».

Udzielniki śviatkavańnia ŭ Taronta.

Volha Ipatava praviała Dzień Voli ŭ Kanadzie.

Biełarusy Taronta majuć hurt «Javarovy ludzi».

Na skajp-suviazi - Siaržuk Sokałaŭ-Vojuš.

Sama ideja takoha telemostu naradziłasia dosyć spantanna. Napačatku hetaha hodu my zaprasili paeta i barda Siaržuka Sokałava-Vojuša, jaki zaraz žyvie ŭ Ist-Branśviku (ZŠA), pryjechać u Taronta na litaraturna-mastackuju viečarynu. Ale Siaržuk tady pryjechać nia zmoh, zaprapanavaŭšy ŭzamien vystupić pierad tarontaŭskimi biełarusami pa Skajpie. Takim čynam, pieršy eksperymentalny skajp-most adbyŭsia 13 lutaha, kali Sokałaŭ-Vojuš ź vialikim pośpiecham čytaŭ svaje vieršy i śpiavaŭ pieśni praz Skajp. Vyrašana było raźvić i pašyryć hety navatarski dośvied, i ŭ vyniku na sioletnim śviatkavańni Dnia Voli skajp-most złučyŭ Taronta ź biełaruskimi asiarodkami ŭ roznych haradach až piaci krainaŭ śvietu!

Spadarynia Maryja Hańko, adna z veteranaŭ Zhurtavańnia biełarusaŭ Kanady, zaznačyła z hetaj nahody, što raniej, u paślavajenny čas, na śviata 25 Sakavika biełaruskija supołki roznych krainaŭ tradycyjna abmieńvalisia paštoŭkami, i padčas śviatkavańniaŭ hetyja vinšavańni abaviazkova začytvalisia z trybuny, bo nieśli ludziam pačućcio jednaści z suajčyńnikami.

Siońnia damahčysia takoha pačućcia jednaści našmat lahčej, bo dziakujučy sučasnym srodkam telekamunikacyi my možam nia tolki razmaŭlać ź ludźmi, jakija adździelenyja ad nas tysiačami kilametraŭ, ale i bačyć ich na ekranie, jak byccam my ŭsie znachodzimsia ŭ adnym pakoi.

Praz prahramu Skajp biełarusaŭ Taronta pavinšavali Staršynia Rady BNR Ivonka Surviłła, staršynia ZBS «Baćkaŭščyna» Alena Makoŭskaja, lider supołki biełarusaŭ Vankuveru Ihar Łamaka, biełaruski student z Čechii Juraś Jurčanka. Staršynia Tavarystva biełaruskaj kultury ŭ Litvie Chviedar Niuńka i lider biełarusaŭ Atavy Piotra Murzionak pierakazali svaje słovy vitańnia praz telefon (pryčym adsutnaść vyjavy na ekranie kampensavałasia vydatnaj jakaściu huku).

Siaržuk Sokałaŭ-Vojuš padrychtavaŭ dla svajho druhoha ŭžo «skajp-mostu» nastolki jarkuju, jomistuju i zapaminalnuju pramovu, što my prosim redakcyju źmiaścić hety tekst na sajcie «Našaj Nivy» całkam. My ličym, što słovy Sieržuka zasłuhoŭvajuć na toje, kab być šyroka pačutymi, bo jany naŭprost źviernutyja da kožnaha biełarusa, u jakoj by krainie śvietu toj ni žyŭ. Bo, jak zaŭvažyŭ inšy ŭdzielnik našaj mižnarodnaj skajp-kanferencyi Źmicier Sidarovič, napačatku XXI stahodździa nie vypadaje havaryć pra asiarodki biełaruskaj emihracyi jak pra adarvanyja ad metrapolii samotnyja vyspački biełaruščyny. Bolš słušna budzie kazać siońnia pra šyrokuju biełaruskuju prysutnaść u śviecie, dzie kožnaja supołka i kožny čałaviek paviazany ź inšymi šmatlikimi štodzionnnymi kantaktami.

Źjaŭleńnie na ekranie samoha Źmitra Sidaroviča, paeta i kampazytara, a taksama šaści jahonych siabroŭ vyklikała ŭ zali asablivaje ažyŭleńnie. Cimoch Avilin, Vadzim Aleksandrovič, Halina Andrejčanka, Hanna Kaściučenka, Alaksiej Krukoŭski, Janka Šablinski dy sam Źmicier vykanali chity «A dzie ž tyja vajary» i «Piena ciomnaha piva». Treba zaznačyć, što hledačy ŭ biełaruskim centry Taronta taksama padchapili hetyja pieśni, lubimyja ŭžo nia pieršym pakaleńniem biełarusaŭ.

Padčas śviatkavańnia, jakoje viała staršynia ZBK Valancina Šaŭčenka, taksama vystupili Aleś Kot i vakalnaja kamernaja hrupa hurta «Javarovy ludzi». Piśmieńnica Volha Ipatava, jakaja ciapier pierabyvaje ŭ Taronta, prezentavała svaju novuju knihu «Znak Vialikaha Mahistra».

Niahledziačy na toje, što sučasnyja bytavyja kamunikacyjnyja prahramy pakul nie dajuć mahčymaści pravodzić sapraŭdnyja telekanferencyi, kab roznyja ŭdzielniki mahli adnačasova bačyć i čuć adzin adnaho, sama ideja «telemostu», zdajecca, spadabałasia udzielnikam virtualnaj sustrečy pa abodva baki akijanu.

Mahčyma, za takim farmatam imprezaŭ — budučynia, i nia tolki śviatkavańniaŭ dnia biełaruskaj niezaležnaści, a naahuł kantaktaŭ pamiž biełaruskimi supołkami roznych krainaŭ.

Vijaleta Kavalova, siabra Hałoŭnaj upravy Zhurtavańnia biełarusaŭ Kanady