Pra heta zajaviŭ premjer‑ministr Siarhiej Sidorski 30 sakavika ŭ Minsku na sustrečy z kiraŭnictvam najbujniejšych amierykanskich kampanij.
«Mnie zdajecca, my znachodzimsia na pravilnym šlachu vybudoŭvańnia intaresaŭ praz ekanomiku ŭ palitycy», — zajaviŭ Sidorski, źviartajučysia da pradstaŭnikoŭ amierykanskaha biźniesu.
Jon nahadaŭ, što «da peŭnaha času» Biełaruś aktyŭna raźvivała adnosiny z amierykanskimi kampanijami, vynikam čaho stała dasiahnieńnie tavaraabarotu bolš čym u 700 młn. dalaraŭ.
Adnak «pa palityčnych matyvach ekanamičnaje ŭzajemadziejańnie z amierykanskimi partniorami było prypyniena»,
adznačyŭ premjer‑ministr. Pavodle jaho słoŭ, pastaŭki pradukcyi šerahu najbujniejšych biełaruskich pradpryjemstvaŭ, najpierš vysokatechnałahičnych, u ZŠA byli prypynieny.
Tym nie mienš, zajaviŭ Sidorski, biełaruski bok abjektyŭna staviŭsia da padziej, što adbyvalisia. «My davali sihnał našym pradpryjemstvam nie spyniać kantakty z amierykanskimi kampanijami, asabliva ŭ śfiery vysokich technałohij, chimičnaj, naftachimičnaj halin», — padkreśliŭ kiraŭnik urada.
Jon vykazaŭ zadavalnieńnie tym, što «amierykanskija kampanii z pavahaj staviacca da biełaruskaj ekanomiki». «Bolš za 300 amierykanskich kampanij pracujuć u roznych śfierach biełaruskaj ekanomiki», — nahadaŭ Sidorski.
Jon padkreśliŭ, što Biełaruś mocnaja ŭ roznych halinach ekanomiki. U pryvatnaści, biełaruskim traktaram naležyć 12% suśvietnaha rynku traktarnaj techniki. Pavodle słoŭ Sidorskaha, u Biełarusi stvarajucca ŭsie nieabchodnyja ŭmovy dla raźvićcia novych vytvorčaściaŭ.
«I my, zrazumieła, majem patrebu ŭ novych inviestycyjach.
Dumaju, što vaša zacikaŭlenaść budzie zaklučacca pieradusim u tym, kab inviestavać u našu ekanomiku», — adznačyŭ premjer‑ministr, źviartajučysia da pradstaŭnikoŭ amierykanskich kampanij.
U jakaści stanoŭčaha prykładu jon pryvioŭ uzajemaadnosiny z Kitajem, jaki płanuje na praciahu dvuch‑troch hadoŭ inviestavać u Biełaruś bolš čym 15 młrd. dalaraŭ.
Havoračy pra mahčymaści inviestavańnia, Sidorski padkreśliŭ, što Inviestycyjny kodeks Biełarusi źjaŭlajecca adnym ź lepšych. Pavodle jaho słoŭ, biełaruski bok hatovy davać dadatkovyja prefierencyi zamiežnym kampanijam «dla realizacyi cikavych prajektaŭ».
U svaju čarhu partnior jurydyčnaj kampanii «Hrynbierh Traŭryh» Devid Bejran adznačyŭ, što biełaruskaje zakanadaŭstva, inviestycyjny klimat «raźvivajecca istotnym čynam».
Na jaho pohlad, sustreča kiraŭnikoŭ amierykanskich kampanij ź biełaruskim prezidentam 29 sakavika paćvierdziła, što «ciapier nastaje histaryčny momant dla adnaŭleńnia i raźvićcia adnosin pamiž krainami». «Ja miarkuju, što ŭvieś śviet budzie nazirać, jak u Biełarusi staviacca da amierykanskich kampanij, jak jany pracujuć tut», — skazaŭ Bejran.
Pavodle jaho słoŭ, vynikam aktyvizacyi ŭzajemaadnosin pavinny stać novyja inviestycyi ŭ Biełaruś i adnaŭleńnie raniejšych abjomaŭ pastavak biełaruskaj pradukcyi ŭ ZŠA.
