Z pačatku hoda ŭ Minskaj vobłaści rezka pavialičyłasia kolkaści vypadkaŭ hibieli ludziej na pažarach.
Jak paviedamili ŭ abłasnoj prakuratury,
pavodle źviestak na 19 sakavika 2010 hoda ŭ ahni zahinuli 123 čałavieki, u tym liku troje dziaciej va ŭzroście da siami hadoŭ, pakinutyja baćkami biez dohladu. Na takuju ž datu 2009 hoda hetyja ličby byli adpaviedna 73 i 2. Kolkaść zahinułych u sutki ŭ Minskaj vobłaści zastajecca adnoj z samych vialikich u Biełarusi.
Prakurory ŭkazvajuć, što asnoŭnaja pryčyna pažaraŭ z hibiellu ludziej — nieaściarožnaje abychodžańnie z ahniom, u asnoŭnym pry kureńni, u stanie ałkaholnaha apjanieńnia. Hibiel ža dziaciej jany naŭprost źviazvajuć ź niedastatkovym uzroŭniem arhanizacyi i praviadzieńnia volnaha času, adsutnaściu ŭvahi z boku darosłych, ich biesturbotnaściu.
U abłasnoj prakuratury taksama źviartajuć uvahu na toje, što ŭ rehijonie
na niedastatkovym uzroŭni vyrašajucca pytańni finansavańnia supraćpažarnych mierapryjemstvaŭ miascovymi orhanami ŭłady.
Asnoŭnyja pryčyny, jakija istotna ŭpłyvajuć na situacyju, u abłasnoj prakuratury źviazvajuć z sacyjalnymi pracesami ŭ hramadstvie, uzroŭniem vychavańnia i ahulnaj kultury čałavieka, jaho pavodzinami ŭ pobycie i na vytvorčaści.
30 sakavika prablema papiaredžańnia hibieli ludziej na pažarach razhladajecca na kaardynacyjnaj naradzie ŭ prakuratury Minskaj vobłaści.
