U internecie źjaviłasia infarmacyja pra aryšt staršyni Hrodzienskaha abłasnoha Savietu deputataŭ Arkadzia Karpucia. Sankcyju nibyta vydaŭ hieprakuror.
Arkadź Karpuć (sprava) i Uładzimir Saŭčanka.
9 krasavika na Błoh Hrodno s13 źmiaściŭ infarmacyju pra aryšt staršyni Hrodzienskaha abłasnoha Savietu deputataŭ Arkadzia Karpucia. Sankcyju na aryšt vysokaha čynoŭnika nibyta vydaŭ hienprakuror Ryhor Vasilevič.
U Hienprakuratury karespandentu NN adkazali łakanična: biez kamientaroŭ. U pryjomnaj Hrodzienskaha abłasnoha Savietu deputataŭ paviedamili, što na dadzieny momant takoj infarmacyi ŭ ich niama, tamu ni paćvierdzić, ni abvierhnuć jaje pakul niemahčyma.
Hrodzienski žurnalist Andrej Pačobut miarkuje, što źjaŭleńnie takoj infarmacyi moža być nastupstvam ahulnaj situacyi ŭ Hrodnie paśla kadravych pierastanovak u abłvykankamie i hučnych aryštaŭ hrodzienskich siłavikoŭ. Jon ličyć, što infarmacyju pra aryšt Karpucia varta ŭsprymać z aściarožnaściu. Sa svaich krynicaŭ Pačobut taksama pakul nie maje paćvierdžańnia źviestak pra čarhovy hučny aryšt. «Ale kali dapuścić, što heta praŭda, to vyhladaje heta na praciah hrandyjoznaj čystki ŭ viarchach hrodzienskaj ułady».
***
Karpuć Arkadź Ivanavič, nar. U 1949 h. Byŭ staršynioj Bierastavickaha rajvykankamu. Sienatar, člen kamisii parłamienckaha schodu sajuza Biełarusi i Rasii pa sacyjalnaj palitycy, navucy, kultury i humanitarnych pytańniach. Čatyry razy zapar abiraŭsia na pasadu staršyni Hrodzienskaha abłasnoha savieta deputataŭ
